નોમિની વિના નથી ઉદ્ધાર

જીવન વીમા પૉલિસી-પીપીએફ-બૅન્ક એકાઉન્ટ્સ-એફડીઃ

- 

‘નાણાં વિનાનો નાથિયો’ એ કહેવત આપણે જાણીએ છીએ, પણ વિવિધ સાધનો-યોજનામાં રોકાણ કર્યા બાદ વ્યક્તિએ જો નોમિની રાખ્યા ન હોય અને યોગ્ય વિલ ન બનાવ્યું હોય તો એના અવસાન બાદ પરિવારજનો નાણાં નજર સામે હોવા છતાં પણ નાણાં વિનાના નાથિયા જેવા બની જઈ શકે છે.

દિવાળી અગાઉ વ્યાપાર-વિશ્વ કૉલમમાં આપણે નોમિની અને કાનૂની વારસદાર વચ્ચેના મૂળભૂત ફરક અને અધિકારની ચર્ચા કરી હતી. આ વખતે આપણે વિવિધ રોકાણ સાધનો-એસેટ્સ માટે નોમિની અને કાનૂની વારસદારનું મહત્ત્વ સમજવાનું છે, જેમાં જીવન વીમા પૉલિસી, બૅન્ક એકાઉન્ટ્સ અને ફિક્સ્ડ ડિપોઝિટ્સનો પણ સમાવેશ થાય છે. નિવૃત્ત બૅન્કર અજિત જ્યોર્જના ઊંડા અભ્યાસ અને અનુભવોને આધારે આ સમજ પ્રસ્તુત કરવામાં આવી છે.

બૅન્ક એકાઉન્ટ્સ અને ફિક્સ્ડ ડિપોઝિટ

બૅન્કમાં સેવિંગ્સ, કરન્ટ એકાઉન્ટ્સ, ફિક્સ્ડ ડિપોઝિટ અને રિકરિંગ ડિપોઝિટ્સમાં પણ નોમિની રાખવાનું ફરજિયાત છે. આમ તો અગાઉથી જ આ નિયમ હતો, જેમ કે તમે બૅન્કમાં ફૉર્મ ભરો ત્યારે જ એમાં નોમિની માટે બે વિકલ્પ આપવામાં આવે છે. પ્રથમ વિકલ્પ અને બીજા વિકલ્પ એમ બે નોમિની રાખી શકાય છે. તેમ છતાં જો તમે નોમિની રાખ્યા ન હોય તો તમે બૅન્કમાં હવે પણ આ વિધિ કરી શકો. તમારે બૅન્કમાં ડીએ-૧ ભરવાનું રહે છે અને જો તમારે નોમિની રદ કરવા હોય અથવા એમાં ફેરફાર કરવા હોય તો ફૉર્મ ડીએ-૨ ભરવાનું રહે છે.  આ કાર્ય તમને ગમે ત્યારે છૂટ છે.