દરદી મટીને બન્યાં દરદીઓનાં સેવક ઉષાકાંત શાહ અને અર્ચન ત્રિવેદી

કૅન્સરમુક્ત થયા પછી ઉષાકાંત શાહે આ રોગના ગરીબ દરદીઓને મદદરૂપ થવાનો નિર્ધાર કર્યો, જે હવે તો એક આંદોલન બની ગયો છે.

- 

‘ડૉક્ટર સાહેબ, મારું કૅન્સર મટ્યું. હવે તો જિંદગી શાંતિથી જીવી શકાશે ને?’

‘હા. પાંચેક વર્ષ નીકળી જશે.’ ડૉક્ટરે ઉષાકાંત શાહને ધીમા સ્વરે કહ્યું.

આ સાંભળીને સહેજ ગભરાયેલા ૬૨ વર્ષી ઉષાકાંતભાઈએ ઘરે જતી વખતે થોડું વિચારી લીધું. ઘરે પહોંચીને ઈષ્ટદેવને પ્રાર્થના કરી, પછી પત્ની પ્રજ્ઞાને કહ્યું: ‘ભગવાને પાંચેક વર્ષની જિંદગી આપી છે એટલે હવે વેપાર બંધ કરવો છે. કૅન્સર હૉસ્પિટલમાં અનેક ગરીબ દરદી પૈસાના અભાવે પૂરતી સારવાર નહીં લઈ શક્યા હોય, એમની સેવાનું ભાથું બાંધીને ભગવાનના ઘરે જવું છે.’

પ્રજ્ઞાબહેને પતિના વિચારમાં સહયોગ કરવાની તૈયારી દાખવી.

આ વાત છે ૨૦૦૬ની. ઉષાકાંતભાઈ દ્વારા સ્થાપિત કરુણા કૅર ફાઉન્ડેશનનું કેન્દ્ર બન્યું અમદાવાદસ્થિત એશિયાની સૌથી મોટી સિવિલ હૉસ્પિટલના કૅમ્પસમાં આવેલી કૅન્સર હૉસ્પિટલ, જ્યાં એ પોતે સારવાર લઈને રોગમુક્ત થયા હતા.