સથવારો છૂટ્યા પછીનો સંઘર્ષ

ગૃહિણીકર્મ નિભાવનાર સ્ત્રીએ એકલા પડ્યા પછી આર્થિક ઉપાર્જનની જવાબદારી પણ વહન કરવાની રહે. ખર્ચાનું મીટર તો ચાલુ જ રહેવાનું. બૅન્કિંગ, ઈન્સ્યોરન્સ, રોકાણ, વગેરે બાબતો પતિ સંભાળતો હોય ત્યારે આ બધામાં ચાંચ ડુબાડતાં શીખવું પડે

- હિતેન આનંદપરા

એક વિધવા મા બીજું તો શું કરે!

ધીમે ધીમે બાપ બનતી જાય છે.

                    - મધુસૂદન પટેલ ‘મધુ’

ઈશ્વરે સ્ત્રી અને પુરુષનું સર્જન એટલા માટે કર્યું છે કે બન્ને જણ એકમેકને પૂરક બની શકે. સ્ત્રીસહજ કાર્યો પુરુષ માટે કટકટ અને વિકટ હોય છે, જ્યારે પુરુષસહજ કાર્યો સ્ત્રી માટે ઉફરાં અને અઘરાં બની રહે. સ્ત્રી માટે માતૃત્વ સહજ છે, જ્યારે પુરુષ એ શીખવું અને કેળવવું પડે. સામે પક્ષે પુરુષ માટે પિતૃસહજ કડક અને કઠોર અભિગમ સ્વાભાવિક છે, જ્યારે સ્ત્રીએ એ કેળવવો પડે.