એવા રે મળેલા વાંચનના મેળ.. ભક્તિ રાઠોડ

ભક્તિ ઉમેરે છેઃ અમારા ઘરે દૈનિક સમાચારપત્રોથી લઈને અખંડ આનંદ, સફારી, ચિત્રલેખા, જી, વગેરે સામયિકો આવતાં. નર્મકોશથી લઈને ઝવેરચંદ મેઘાણી, ચુનીલાલ મડિયા, કનૈયાલાલ મુનશી, પન્નાલાલ પટેલ, વગેરેનાં ઢગલાબંધ પુસ્તકો. એ જોઈને ગુજરાતી ઘરમાં આટલાં પુસ્તક હોવાં જ જોઈએ એવી મારી માન્યતા બંધાઈ

- 

આજથી પાંચેક વર્ષ પહેલાં રંગભૂમિ-ટીવી-ફિલ્મઅભિનેત્રી ભક્તિ રાઠોડનાં લગ્ન નાટક-ટેલિવિઝન-રાઈટર-ડિરેક્ટર ધીરજ પલશેતકર સાથે થયાં. નવરા-બાયકોએ સંસાર માંડ્યો ને મુંબઈના પરા બોરીવલીના સરસમજાના ઘરમાં પોતપોતાનો સામાન અનપૅક કર્યો ત્યારે પુસ્તકનાં બૉક્સ ભક્તિનાં ૧૪ હતાં અને.. ધીરજભાઉનાં પણ ૧૪. એમ કહી શકાય કે ૨૮ ગુણ પરફેક્ટ મળ્યા.

ભક્તિનો જન્મ, ઉછેર, શિક્ષણ મુંબઈમાં. એણે એલએલબી કર્યું, પણ કેવળ કાયદાનું જ્ઞાન મેળવવા. ન તો એણે બાર એક્ઝામ આપી કે ન સનદ લીધી. શાળાશિક્ષણ અંગ્રેજી માધ્યમમાં થયું, પણ માવતર નીલા સોની અને કનુભાઈ રાઠોડે એને બારાખડીથી લઈને ગુજરાતી સાહિત્યની સમજણ આપી. એ કહે છે: ‘પપ્પા ચાર જ ચોપડી ભણેલા, પણ એમને વાંચવાનું, જ્ઞાન મેળવવાનું ઘેલું હતું. એમની સગાઈવિધિ બાદ બન્ને જ઼હ બીચ ફરવા ગયાં. મમ્મી ત્યારે ૧૭ વર્ષની હતી, પપ્પા ૨૦ના. સમી સાંજે દરિયાકાંઠે પપ્પાએ મમ્મીને જીવનમાં શું બનવું છે એ પૂછ્યું તો મમ્મી એના પ્રિય લેખકોનાં નામ બોલી. સાંભળીને પપ્પાની આંખોમાં અનેરી ચમક આવી. એ પછી આખી સાંજ એમણે પુસ્તકો, લેખકોની ચર્ચામાં વિતાવી હતી!'