જે જે છે, જેવા છે એને એ જ રીતે સ્વીકારીએ તો?

આપણા એક વિશ્વની અંદર પણ કેટલાં બધાં નાનાં-મોટાં અગણિત વિશ્વ આપણી આજુબાજુ જીવતાં હોય છે.

- ડૉ. મિતાલી સમોવા

આપણે બધાં જ જીવનભર સતત સારાં બનવા (અથવા બીજાની નજરે આ તો સારાં લાગવા), પ્રિયજનોના આજ્ઞાકારી કે કહ્યાગરાં બનવા કે મથતાં રહીએ છીએ. સમાજના સ્થાપિત નિયમોને વળગી રહીએ છીએ. મોટે ભાગે પરંપરાગત ચાલી આવતી પ્રથાને આપણે બદલતાં નથી. આપણામાંથી ઘણા લોકો ક્યારેય વ્યવસ્થાને સામો પ્રશ્ન પૂછતાં નથી, કારણ કે આપણને સતત એ ભય સતાવ્યા કરે છે કે આપણે પ્રવાહથી વિરુદ્ધ જઈશું તો આપણને અળગાં પાડી દેવામાં આવશે.

દરેકેદરેક જીવિત વ્યક્તિ માટે બીજા માણસો સાથેના અર્થપૂર્ણ સંબંધ એના જીવનનો આધાર હોતો હોય છે. આવા અર્થપૂર્ણ સંબંધોની ગેરહાજરીમાં કે એમના દ્વારા થતી અવગણનાને કારણે ક્યારેક પોતાના જીવનની કોઈ મકસદ લાગતી નથી અને કંટાળીને એ જીવનનો અંત આણવા માગે છે.

- પણ વિચારો કે શું કોઈ તમારી ઓળખીતી-પાળખીતી વ્યક્તિ તમે જે છો, જેવા છો એવો સ્વીકાર ન કરે તો એ ખરેખર તમારી ખામી ગણાય? આ અસ્વીકાર શું એવડી મોટી બાબત હોઈ શકે કે તમે તમારું જીવન ટૂંકાવી આટલી સુંદર દુનિયા છોડી દો અને બીજા તમામ સંબંધોનો અંત આણી દો? શું આ કારણસર નિરાશાજનક અભિગમ અપનાવીને બધું જ ખતમ કરી નાખવું જોઈએ? જો કોઈ વ્યક્તિ આ જીવનને જે દૃષ્ટિએ તમે જુઓ છો એ દૃષ્ટિએ નથી જોઈ શકતી તો તમને શું ફેર પડે છે?