ઊંચી ઉડાનના નીચ માનવી

વિમાનપ્રવાસમાં બેકાબૂ, બેશરમ, બેશિસ્ત, બેફામ બનીને અણછાજતું વર્તન કરનારા ઉતારુના આંકડા દરેક વેબસાઈટ પર નોખા છે. કોઈ વર્ષે ૬૦૦૦નો ફિગર મૂકે છે તો કોઈ બે-ત્રણ હજારનો

- 

ત્રીસ-પાંત્રીસ હજાર ફૂટની ઊંચાઈએ ઊડવાના હો કે ઊડી રહ્યા હો ત્યારે શાણપટ્ટી દેખાડવામાં શાણપણ હોતું નથી એવી સાદી વાત ઘણા ઉતારુઓ કેમ સમજી નહીં શકતા હોય એ જ અમને તો સમજાતું નથી.

હમણાં પેલા શંકર મિશ્રાજીનો કિસ્સો બહુ ચગ્યો છે, જેમણે ચાલુ વિમાને એક વૃદ્ધા પર લઘુશંકા કરી નાખેલી. એમને હવે કાયમ માટે કે લાંબો સમય વિમાનમાં બેસવા નહીં મળે. નોકરી તો ગઈ જ, કદાચ કારાવાસ પણ થાય. એક વિમાન પરિચારિકા અમને કહે કે બહેન, દરેક ફ્લાઈટમાં કોઈ ને કોઈ માથાફરેલ ભટકાતા જ હોય છે, પણ અમે મામલો સાચવી લઈએ. વાત વધે તો જ રિપોર્ટ કરીએ.