કોંગ્રેસ માટે અસ્તિત્વ ટકાવી રાખવાનો જંગ

હિમાચલ પ્રદેશની ચૂંટણી જીતી કોંગ્રેસે ગુજરાતમાંથી એનો એકડો નીકળી જવા સામે થોડી રાહત મેળવી, પણ પક્ષની નેતાગીરીના નામે જે મીંડું છે એનું શું?

- હીરેન મહેતા

કોંગ્રેસી પંજો હજી કેટલા ઘા ઝીલી શકશે?

ગુજરાત વિધાનસભા ચૂંટણીનાં પરિણામ સાથે કોંગ્રેસ વધુ એક રાજ્યમાં હાંસિયામાં ધકેલાઈ ગઈ. અલગ રાજ્ય તરીકે ગુજરાતે આકાર લીધો એ પછી ત્રણેક દાયકા સુધી કોંગ્રેસે સત્તા ભોગવી, પણ ૧૯૯૫માં ભાજપના ઉદય સાથે કોંગ્રેસ આથમણે રસ્તે ચાલવા લાગી. ગુજરાત વિધાનસભાની છેલ્લી ચૂંટણી (૨૦૧૭)માં ભાજપવિરોધી માહોલને કારણે કોંગ્રેસને એક ક્ષણ માટે ક્ષિતિજે સત્તા નજરે પડી, પણ આખરી પરિણામ સુધીમાં ભાજપે ગાંધીનગરની ગાદી જાળવી રાખવા જેટલી બેઠકો મેળવી લીધી હતી.