મુદ્દાવિહીન લાગતી ચૂંટણીમાં શું ભાજપ-કોંગ્રેસના બાગી ઉમેદવારો જ બૅન્ડ બજાવશે?

મતદાનના દિવસ નજીક આવી રહ્યા છે ત્યારે રાજકીય પક્ષો કાવાદાવા અને વ્યૂહનીતિ ઘડવામાં વ્યસ્ત છે. ઉપર ઉપરથી શાંત દેખાતા વાતાવરણમાં અંદરખાને જે રંધાઈ રહ્યું છે એના રંગ હવે જોવા મળશે.

- કેતન ત્રિવેદી (અમદાવાદ)

ભાજપ નેતાગીરીની સામે પડી ધરાર ચૂંટણી લડી રહેલા દિનુ પટેલ અને મધુ શ્રીવાસ્તવ: શાસક પક્ષ માટે સમીકરણ બગાડી શકવાની છે ક્ષમતા?

જામે છે, ધીમે ધીમે જામે છે ચૂંટણીનો જમહોલ. હજી હમણાં સુધી એમ લાગતું હતું કે આ વખતે ગુજરાતમાં ચૂંટણીનો કોઈ માહોલ જામતો નથી, પણ આ અઠવાડિયે નરેન્દ્ર મોદી અને રાહુલ ગાંધીએ રૅલી યોજ્યા પછી અને ઉમેદવારોએ ચૂંટણી કાર્યાલયો ખોલીને પ્રચારના શ્રીગણેશ કરી દીધા પછી હવે ગુજરાતમાં ચૂંટણીનો માહોલ જામતો જાય છે.

વેલ, ચૂંટણીને લગતા ખરા ખેલ તો આ દિવસોમાં જ ખેલાતા હોય છે એટલે આગામી બે અઠવાડિયાંમાં ગુજરાતમાં રાજકીય રીતે અનેક રંગ જોવા મળશે. ઉદાહરણ તરીકે, મધ્ય ગુજરાતમાં દેવગઢ બારિયા બેઠક પરથી શરદ પવારની નૅશનાલિસ્ટ કોંગ્રેસના ઉમેદવાર ગોપસિંહ લવારે છેલ્લા દિવસે જ ઉમેદવારીપત્રક પાછું ખેંચીને એનસીપી–કોંગ્રેસના જોડાણને આંચકો આપ્યો છે. સમજૂતી પ્રમાણે આ બેઠક એનસીપીના ફાળે આવેલી એટલે કોંગ્રેસના ઉમેદવારે અહીં ફૉર્મ ન જ ભર્યું હોય. એ કારણે આ બેઠક પર ચૂંટણી પહેલાં જ લડાઈ સમેટાઈ ગઈ. અફ કોર્સ, પાર્ટીના ઉમેદવાર લડતા હોવાથી અહીં ચૂંટણીજંગ ખેલાશે જરૂર, પણ મુખ્ય સ્પર્ધક તરીકે કોંગ્રેસની ગેરહાજરી ભાજપ માટે રસ્તો આસાન કરશે.

આ તો એક જ કિસ્સો છે. હજી ઘણી બેઠકો પર જ્યાં અપક્ષ ઉમેદવારો પોતાના મત કાપશે એવો ડર છે ત્યાં રાજકીય પક્ષો એમને મેદાનમાંથી હટાવવા એટલે કે પ્રચાર બંધ કરીને ચુપચાપ હરીફાઈમાંથી ખસી જવા સામ-દામ-દંડ-ભેદના નુસખા અપનાવશે.