કાજુ-ગાંઠિયા, કાજુ-કસ્તૂરી, શિખંડ-આઈસક્રીમ.. એલા, એય.. આવવા દે તું તારે

ખાઈ-પીને જલસા કરવામાં માનતા સૌરાષ્ટ્રવાસીઓના સ્વાદના ચટાકાની વાત જ નિરાળી. અહીં શહેરે શહેરે, ગામડે ગામડે ખાણી-પીણીનાં વૈશિષ્ટ્ય જોવા મળે છે. લેટેસ્ટ ટ્રેન્ડ છે એક પ્રાંતની વાનગીમાં બીજા પ્રાંતની વાનગી ઉમેરી ત્રીજી વાનગીનાં સ્વાદિષ્ટ સંયોજન..

- જયેશ દવે (ભાવનગર)

વડા પ્રધાન નરેન્દ્ર મોદી ગુજરાતના પ્રવાસે હોય અને ભાવનગર પહોંચે ત્યારે કહે: ભાવનગર આવું ત્યારે નરશીબાવાના ગાંઠિયા, દાસના પેંડા અચૂક યાદ આવે.

વડા પ્રધાનની આ વાત ગુજરાતીઓના ખાણી-પીણીના શોખ અને સ્વાદના ચટાકાને દર્શાવી જાય છે. ગુજરાતી માણસ સિંગાપોર જાય, સાન્તા મોનિકા જાય કે સૅન્ટ પિટ્સબર્ગ જાય.. ચટાકેદાર ગુજરાતી ભોજન શોધતો જ રહે છે. એમાં જે સવારે નાસ્તામાં ગાંઠિયા-સંભારો-ચા ને રાતે ભાખરીશાક, કઢી-ખીચડી શોધે ઈ નક્કી કાઠિયાવાડી.

મોહનથાળ

આજે સૌરાષ્ટ્રની કંઈટલી પરંપરાગત વાનગીઓ અવનવા પ્રયોગો સાથે ઘર, લારીથી નીકળીને આલા દરજ્જાની રેસ્ટોરાં સુધી પહોંચી ગઈ છે, જેમ કે ભજિયાં એ કોઈ નવી વાનગી નથી, એના સ્વરૂપમાં સુધારા-વધારા થયા છે. હવે તો એ રોડસાઈડ ધાબા, લારીથી લઈને રેસ્ટોરાંમાં પોતાનું સ્થાન જમાવી ચૂક્યાં છે. ખાસ કરીને રાજકોટમાં જમણવારમાં લાઈવ ભજિયાં અનિવાર્ય બની ગયાં છે.

લાઈવ ભજિયાંની જેમ ઘરોઘર નાસ્તા અને હળવાં ભોજનના સમયની વાનગી પૂડલા પણ લગ્નસમારંભમાં લાઈવ પીરસવામાં આવે છે. રાજકોટ-ભાવનગર હાઈ-વે પર માત્ર પૂડલા ખવડાવતા ધાબા પર શિન-વિમાં જોવા મળતી ભીડ એની લોકપ્રિયતા દર્શાવી જાય છે.

ચૂરમાના લાડુ