રાજકાજ ચાણક્ય

મોદીના શાસનકાળનાં ૧૧ વર્ષ, લોકો શું માને છે?

- ચાણક્ય

વડાપ્રધાન નરેન્દ્ર મોદીની સરકારના ત્રીજા કાર્યકાળનું એક વર્ષ પૂર્ણ થયું છે અને નરેન્દ્ર મોદીના વડાપ્રધાનપદને ૧૧ વર્ષ પૂર્ણ થયાં છે. આ સમયગાળા દરમિયાન મોદીની સરકારે કરેલાં કાર્યોનું વિશ્લેષણ અને સમીક્ષા થઈ રહી છે. સરકારના સમર્થનમાં મોદીની ૧૧ વર્ષની સિદ્ધિઓ વર્ણવે છે ત્યારે વિરોધીઓ તેમના કાર્યકાળ દરમિયાન શાસનમાં રહેલી ક્ષતિઓ ગણાવે છે. ભાજપ પ્રમુખ જે.પી. નડ્ડાએ મોદીના શાસનકાળનાં ૧૧ વર્ષની મહત્ત્વની સિદ્ધિઓ ગણાવી છે, પરંતુ ભાજપના પક્ષ પ્રમુખ સરકારની પ્રશંસા કરે તેમાં નવાઈ નથી. મહત્ત્વની વાત એ છે કે નરેન્દ્ર મોદીનાં ૧૧ વર્ષના કાર્યકાળને દેશના લોકો કઈ રીતે નિહાળે છે, આ બાબતમાં સી-વૉટર દ્વારા એક સર્વેક્ષણ કરીને લોકોના અભિપ્રાય લેવામાં આવ્યા હતા અને લોકો મોદી સરકારના કામકાજથી કેટલા પ્રમાણમાં સંતુષ્ટ છે તે જાણવાનો પ્રયાસ કરવામાં આવ્યો હતો.