പുതിയ വീടിന്റെ വയറിങ് ചെയ്യുമ്പോൾ

ഇലക്ട്രിക്കൽ ജോലികൾ ആരംഭിക്കുന്നതിനു മുന്നേ ശ്രദ്ധിക്കാൻ പലതുണ്ട് കാര്യങ്ങൾ. ആരംഭത്തിലേ കൃത്യമായ പ്ലാനിങ് വേണം.

- 

വീട് പണിയുമ്പോൾ എല്ലാ കാര്യങ്ങളിലും വീട്ടുകാരുടെ ശ്രദ്ധയുണ്ടാവും. എന്നാൽ ഇലക്ട്രിക്കൽ പണി വരുമ്പോൾ ഇലക്ട്രീഷ്യനെ ഏൽപ്പിച്ച് "ഞാൻ ഈ നാട്ടുകാരനേയല്ല' എന്ന മട്ടിലങ്ങ് മാറി നിൽക്കും. ഇലക്ട്രീഷ്യൻ പറയുന്ന സാധനങ്ങൾ വാങ്ങിക്കൊടുക്കുക എന്ന ചുമതല മാത്രം. ആ രീതി മാറേണ്ടിയിരിക്കുന്നു. ഇലക്ട്രിക്കൽ ജോലികളിൽ വീട്ടുകാരുടെ കൃത്യമായ ശ്രദ്ധ വേണം. സുരക്ഷിതത്വവും കാര്യക്ഷമതയും ഉറപ്പിക്കാൻ അതാവശ്യമാണ്.

ഇലക്ട്രീഷ്യന്റെ ലൈസൻസ്

കോൺട്രാക്ടറെയോ ബിൽഡറെയോ പണി പൂർണമായി ഏൽപ്പിക്കുകയാണെങ്കിലും ഇലക്ട്രിക്കൽ ജോലിയുടെ കാര്യ ത്തിൽ ധാരണ വേണം. എന്തൊക്കെയാണ് നമ്മുടെ ആവശ്യങ്ങൾ എന്ന് ഇലക്ട്രീഷ്യനോടോ കോൺട്രാക്ടറോടോ പറയണം. അവ കൃത്യമായി ചെയ്യുന്നുണ്ടോ എന്നു ശ്രദ്ധിക്കണം. ഇലക്ട്രിക്കൽ ജോലികൾ ആരംഭിക്കുന്നതിനു മുന്നേ കൃത്യമായ പ്ലാനിങ് വേണം. ഓരോ മുറിയിലും ഇടങ്ങളിലും എത്ര പ്ലഗ്, സ്വിച്ച്, ലൈറ്റ് എവിടെയെല്ലാം തുടങ്ങിയ കാര്യങ്ങളിൽ വ്യക്തമായ ധാരണ വേണം. ഹോം ഓട്ടമേഷൻ പോലെ ഭാവിയിലെ ആവശ്യങ്ങൾ മുന്നിൽക്കണ്ട് പവർ ഔട്ട്ലറ്റ് നൽകണം. നമുക്കു വേണ്ടുന്ന ലോഡ് താങ്ങുന്ന രീതിയിലുള്ള പ്ലാൻ ആണ് വേണ്ടത്.

ഇലക്ട്രീഷ്യന് ലൈസൻസ്, അനുഭവപരിചയം എന്നിവയുണ്ടോ എന്ന് ശ്രദ്ധിക്കണം. വീടിന്റെ വലുപ്പം അനുസരിച്ച് ബി ക്ലാസ് സി ക്ലാസ് ലൈസൻസ് ഉണ്ടോ എന്നുറപ്പ് വരുത്തണം. ഇലക്ട്രിക്കലിലെ ഏറ്റവും പുതിയ ട്രെൻഡുകളെ കുറിച്ചും സുരക്ഷയെ കുറിച്ചുമെല്ലാം അറിയാവുന്ന ആളായിരിക്കണം. നേരിട്ട് സംസാരിച്ച് ഇക്കാര്യങ്ങൾ ഉറപ്പ് വരുത്തുക.