Small Bathroom 40 Tips

ബജറ്റിന്റെ വലിയൊരു ശതമാനം കവരുന്നത് ബാത്റൂമാണ്. അതിനാൽ സൂക്ഷിച്ചാൽ ദുഃഖിക്കേണ്ട.

- 

ഭംഗിയും വൃത്തിയുമുള്ള ബാത്റൂം ആരുടെയും മനം കവരും. എന്നാൽ അതോടൊപ്പം തന്നെ ഉപയോഗി ക്കാൻ സുഖവും പരിപാലിക്കാൻ എളുപ്പവുമുള്ള ബാത്റൂം പണിയാൻ ശ്രദ്ധിക്കുക. നല്ല ബാത്റൂം സ്വന്തമാക്കാനുള്ള വഴികൾ വായിച്ചറിയാം.

ഡിസൈൻ

മികച്ച രീതിയിൽ വായുസഞ്ചാരവും വെളിച്ചവും ലഭിക്കുന്ന ഇടത്താണ് ബാത്റൂമിനു സ്ഥാനം നൽകേണ്ടത്. ബാത്റൂമുകളെല്ലാം വീടിന്റെ ഒരേ വശത്തു തന്നെ നൽകിയാൽ പ്ലമിങ്ങിന്റെ ചെലവ് കുറയ്ക്കാം. പൈപ്പുകൾ പുറത്തേക്ക് എടുക്കേണ്ടതിനാൽ പുറംഭിത്തിയോടു ചേർന്ന് ബാത്റൂം വരുന്നതാണ് നല്ലത്.

സ്ഥലവും പണവും ലാഭിക്കണമെന്ന ഉദ്ദേശ്യമുണ്ടെങ്കിൽ ഏറ്റവും അനുയോജ്യമായ ആകൃതി ദീർഘചതുരമാണ്. വീടിന്റെ തീമും ഡിസൈനും അനുസരിച്ച് ബാത്റൂമിന്റെ ആകൃതി ഏതു വിധത്തിലും മാറ്റിയെടുക്കാൻ സാധിക്കും; പക്ഷേ, ചെലവു കൂടും.

ബാത്റൂമിനകം മൂന്നായി വിഭജിക്കുകയാണ് പതിവ്. ഷവർ ഏരിയ, ക്ലോസറ്റ് ഏരിയ, വാഷ്ബേസിൻ ഏരിയ എന്നിവയാണ് അത്. ഓരോ വിഭാഗത്തിനും 90 സെമീ ലഭിക്കുക എന്ന ഉദ്ദേശ്യത്തോടെ നീളം 270 സെമീ എടുക്കുന്നതാണ് ഏറ്റവും നല്ലത്. ഷവർ ഏരിയയ്ക്ക് 90 സെമീ, ക്ലോസറ്റിന് 80 സെമീ, വാഷ്ബേസിന് 70 സെമീ എന്നിങ്ങനെ നൽകി 240 സെമീ നീളത്തിലും ഒതുക്കാം. കുറഞ്ഞത് 140 സെമീ വീതി വേണം. ഫ്ലാറ്റുകളിലും മറ്റും ഏറ്റവും കുറഞ്ഞ 230x130 സെമീ അളവിലും ബാത്റൂമുകൾ നൽകാറുണ്ട്.

ബാത്റൂം ചെറുതാണെങ്കിലും വാതിൽ വീൽചെയർ കയറിപ്പോകാൻ പാകത്തിൽ വീതിയിൽ നിർമിക്കണം. അതുപോലെ പ്രായമായവർക്ക് പിടിച്ചെഴുന്നേൽക്കാൻ ഗ്രിപ്പ് ബാറും മടക്കിവയ്ക്കാവുന്ന സീറ്റും നൽകാം.

ചെറിയ ബാത്റൂമിന്റെ വാതിലിന് ഗ്ലാസ് നൽകാം. ഫോസ്റ്റഡ് ഗ്ലാസ് നൽകിയാൽ അകത്തേക്ക് കാഴ്ചയെത്തുകയില്ല.

സാനിറ്ററി വെയർ

സാനിറ്ററിവെയർ ഇടയ്ക്കിടെ മാറ്റാൻ പറ്റില്ലല്ലോ. അതു കൊണ്ട് അവ തിരഞ്ഞെടുക്കുമ്പോൾ ശ്രദ്ധ വേണം. സാനിറ്ററി വെയർ ബ്രാൻഡ് ആദ്യം തന്നെ തീരുമാനിക്കുക. എല്ലാ ബാത്റൂമിലും ഒരേ മോഡൽ തന്നെ ഉപയോഗിക്കാൻ ശ്രദ്ധിക്കുക. വാഷ്ബേസിൻ ഒരേ മോഡൽ, ക്ലോസറ്റ് ഒരേ മോഡൽ അങ്ങനെ. സർവീസിങ്ങിന് എളുപ്പം ഇതാണ്.