പണമുണ്ടാക്കാൻ പൗൾട്രി സംരംഭങ്ങൾ

എന്നും വരുമാനം എഗർ നഴ്സറി മുട്ടക്കോഴിക്കുഞ്ഞുങ്ങളെ വളർത്തി വിൽക്കുന്ന എഗർ നഴ്സറി സംരംഭവുമായി ജയന്തി

- ജോബി ജോസഫ് തോട്ടുങ്കൽ

മുട്ടയുമായി ചേർത്തുവച്ച പേരാണ് വട്ടംകുളം. ഗ്രാമീണ വനിതകളെ സ്വയംപര്യാപ്തരാക്കുക എന്ന ലക്ഷ്യത്തോടെ മലപ്പുറം ജില്ലയിലെ എടപ്പാളിനടുത്ത് വട്ടംകുളം ഗ്രാമപഞ്ചായത്തിൽ ഏതാണ്ട് 15 വർഷം മുൻപ് മൃഗസംരക്ഷണവകുപ്പു നടപ്പാക്കിയ മുട്ടയുൽപാദന പദ്ധതി സംസ്ഥാനമാകെ ശ്രദ്ധിക്കപ്പെട്ടു. പിൽക്കാലത്ത് ഇതര വരുമാന മാർഗങ്ങൾ വന്നതോടെ പല കുടുംബങ്ങളും മുട്ടക്കോഴി വളർത്തലടക്കമുള്ള ലഘു വരുമാന മേഖലകളിൽ നിന്നു വഴിമാറി. എങ്കിലും കൃഷിയനുബന്ധ വരുമാനമാർഗമെന്ന നിലയിൽ വീട്ടുവളപ്പിലെ മുട്ടക്കോഴി വളർത്തലിന് ഇപ്പോഴും നല്ല സാധ്യതയുണ്ടെന്ന് വട്ടംകുളത്തെ എഗർ നഴ്സറി സംരംഭക ജയന്തി പറയുന്നു. കൃഷിയെ മാത്രം ആശ്രയിച്ചു കഴിയുന്ന കുടുംബങ്ങൾക്ക് ചെറുതെങ്കിലും, നിത്യവും മുടങ്ങാതെ വരുമാനം നൽകാൻ മുട്ടക്കോഴിക്കു കഴിയും. അതിനായി ഒട്ടേറെപ്പേർ ജയന്തിയുടെ എഗർ നഴ്സറിയിൽ നിന്നു കുഞ്ഞുങ്ങളെ വാങ്ങുന്നുമുണ്ട്.

നഴ്സറിക്കുഞ്ഞുങ്ങളിലൂടെ നേട്ടം

വട്ടംകുളത്ത് മൃഗസംരക്ഷണവകുപ്പ് മുട്ടക്കോഴി പദ്ധതി ആരംഭിച്ച കാലത്ത് അതിന്റെ ഭാഗമായി തുടങ്ങിയതാണ് ജയന്തിയുടെ എഗർ നഴ്സറി. ഒരു ദിവസം പ്രായമായ മുട്ട കോഴിക്കുഞ്ഞുങ്ങളെ വാങ്ങി 45-50 ദിവസം പരിപാലിച്ചു വിൽക്കുകയാണ് എഗർ നഴ്സറി ചെയ്യുന്നത്. മലപ്പുറം, പാലക്കാട് ജില്ലകളിൽ പ്രവർത്തിക്കുന്ന സർക്കാർ ഹാച്ചറികളിൽ നിന്നോ അവിടെയില്ലാത്തപ്പോൾ സ്വകാര്യ ഹാച്ചറികളിൽ നിന്നോ ആണ് കുഞ്ഞുങ്ങളെ വാങ്ങുന്നത്. തദ്ദേശ സ്വയംഭരണ സ്ഥാപനങ്ങൾ വർഷങ്ങളായിത്തുടരുന്ന പദ്ധതിയിലേക്കു കോഴിയും കൂടും വിതരണം ചെയ്യു ന്നതാണ് ജയന്തിയുടെ മുഖ്യ വരുമാനം. പദ്ധതിപ്രകാരമല്ലാതെയും കോഴിക്കുഞ്ഞും കൂടും വില്പനയുണ്ട്.