രോഗനിയന്ത്രണത്തിന് 10 കൽപനകൾ

രോഗകാരികളോടു പ്രതിരോധവും അവയുടെ സംഹാരവും എങ്ങനെ

- പ്രമോദ് മാധവൻ അസി. ഡയറക്ടർ, കൃഷിവകുപ്പ് ഫോൺ: 9496769074

കീടബാധയെന്ന് കേട്ടാൽ മനസ്സിലായിരുന്ന പണ്ടത്തെ കർഷകർക്കും വിളകളുടെ രോഗബാധയെക്കുറിച്ച് ശരിയായ ധാരണയില്ലായിരുന്നു. കീടങ്ങളെ തടയാൻ മുൻകൂട്ടി കീടനാശിനി തളിക്കണമെന്നു കരുതിയിരുന്ന അവർ സൂക്ഷ്മാണുക്കൾ മൂലം പ്രത്യക്ഷപ്പെടുന്ന രോഗങ്ങൾക്കെതിരെയും മുൻകൂട്ടി കീടനാശിനി പ്രയോഗിച്ചിരുന്ന കാലമുണ്ടായിരുന്നു. പ്രദേശത്തെ കീടനാശിനി വ്യാപാരിയാണ് അവരുടെ ഉപദേശകർ. പിന്നെ കൂടിപ്പോയാൽ ബോർഡോ മിശ്രിതം തളിക്കും. അത് തന്നെ. പതിയെ മരുന്നു കമ്പനിക്കാർ കുലവാട്ടം, പോളരോഗം, ഇവയ്ക്കെതിരെ ഞങ്ങളുടെ മരുന്ന് തളിക്കൂ എന്നൊക്കെയുള്ള ബഹുവർണ പരസ്യങ്ങൾ ഇറക്കാൻ തുടങ്ങി. അങ്ങനെ കൃഷിയിൽ കുമിൾ നാശിനികളുടെ ഉപയോഗം വർധിക്കാൻ തുടങ്ങി. റബർ കൃഷി വ്യാപകമായതോടെ കർഷകർക്ക് കുമിൾ നാശിനികളുടെ ഉപയോഗവും ഫലപ്രാപ്തിയും മനസ്സിലായിത്തുടങ്ങി.

മികച്ച വിളവ് നേടണമെങ്കിൽ കളകൾ, കീടങ്ങൾ,രോഗ ങ്ങൾ എന്നിവയെ അതിജീവിക്കണം വിളകൾ. ഇവയിൽ കളകൾ, കീടങ്ങൾ എന്നിവയെ കർഷകനു നേരിൽ കാണാം. കീടബാധയിൽ ലക്ഷണങ്ങളുടെ പിൻപറ്റി നിരീക്ഷിച്ചാൽ കാരണഭൂതനെ കണ്ടെത്താം. പക്ഷേ, രോഗങ്ങളുടെ കാരണക്കാരെ കണ്ടെത്തുക സാധാരണ കർഷകനു ശ്രമകരം. കാരണം, നഗ്നനേത്രങ്ങൾകൊണ്ട് ഈ സൂക്ഷ്മ ജീവികളെ കാണാൻ കഴിയില്ല. രോഗലക്ഷണങ്ങൾ പഠിച്ചവർക്കും പരിചയസമ്പന്നരായ കർഷകർക്കും ഒരു പരിധി വരെ ഇവയെ തിരിച്ചറിയാൻ കഴിയും. ഒരു ചെടിയിൽ രോഗം വന്നുഭവിക്കണമെങ്കിൽ 3 അനുകൂല സാഹചര്യങ്ങൾ (Disease Triangle) ഉണ്ടാകണം.