ഇത്തിരി വിതച്ച് ഒത്തിരി കൊയ്യുന്നവർ

ഡ്രം സീഡർ വിതയുടെ നേട്ടങ്ങൾ

- ജെയിംസ് ജേക്കബ്

ഒരു പാടത്ത് ഏക്കറിന് 40 കിലോയിലേറെ വിത്തു വിതച്ചവർക്ക് ശരാശരി 15 ക്വിന്റൽ നെല്ല് വിളവു കിട്ടി. അങ്ങനെയെങ്കിൽ അതിന്റെ മൂന്നിലൊന്നുപോലും വിത്തു വിതയ്ക്കാത്തവർക്ക് അതേ പാടത്ത് അതേ സീസണിൽ ഏക്കറിന് എത്ര നെല്ല് കിട്ടിക്കാണും? പരമാവധി 5 ക്വിന്റൽഅല്ലേ? എന്നാൽ അറിയുക, ഏക്കറിൽ 12 കിലോ വീതം മാത്രം വിത്ത് വിതച്ച കാവാലം വടക്കേ അറ്റത്ത് സോജൻ വർഗീസിനു കിട്ടിയത് 25 ക്വിന്റൽ നെല്ലാണ്. മറ്റൊരു പാടത്ത് സോജന്റെ സുഹൃത്ത് ജോബി ഇതേ തോതിൽ വിത്തു വിതച്ചു നേടിയതു 31 ക്വിന്റൽ വിത്തിന്റെ അളവല്ല, വേരും വെയിലും വായുസഞ്ചാരവും വിയർപ്പുമാണ് വിളവുണ്ടാക്കുന്നതെന്നു തെളിയിക്കുകയാണ് ഈ സുഹൃത്തുക്കൾ. ഇതെങ്ങനെ സാധ്യമാകുമെന്നു ചോദിക്കുന്നവരോട് സോജൻ തിരിച്ചു ചോദിക്കും, ആരാണ് നിങ്ങളുടെ വിതക്കാരൻ?

പാടത്ത് ആരു വിതയ്ക്കുന്നതാണു നല്ലത്? വിതക്കാരൻ, ഡ്രോ ൺ, ഡ്രം സീഡർ? ചോദ്യം നെൽകർഷകരോടാണ്; വിശേഷിച്ച് കുട്ടനാട്ടിലെ കർഷകരോട്. “പലരും ഡ്രോൺ വിത ശ്രമിച്ചിട്ടു പോലുമില്ല. ഡ്രം സീഡർ വർഷങ്ങളായി ഇവിടെയുണ്ടെങ്കിലും അതൊന്നു പരീക്ഷിക്കാനോ മെച്ചപ്പെടുത്താനോ തുനിഞ്ഞവരും വിരളം. പുതിയ ആശയങ്ങളോടു പുറം തിരിഞ്ഞു നിൽക്കുന്നവരുടെ മുന്നിൽ 3 രീതികളും പരീക്ഷിച്ചു കിട്ടിയ ഫലങ്ങൾ നിരത്തുകയാണ് സോജനും ജോബിയും.

കുട്ടനാട്ടിലെ കാവാലം സ്വദേശികളാണ് ഇരുവരും. 27 വർഷം മുൻപ് പിതാവിന്റെ മരണശേഷം കൃഷി ഏറ്റെടുത്ത സോജൻ കുടുംബംവക 16 ഏക്കറിലെ ആറേക്കറിൽ വിത ച്ചാണു തുടക്കമിട്ടത്. മുഴുവൻസമയ കർഷകനായി മാറിയ ഇദ്ദേഹം ഈ വർഷം 52.5 ഏക്കറിലാണു വിളവിറക്കിയത്. കൂടുതൽ സ്ഥലത്ത് വിതച്ചെന്നതല്ല, വേറിട്ട വഴികളിലൂടെ വരുമാനം മെച്ചപ്പെടുത്താനായതാണ് സോജനെ വ്യത്യ സ്തനാക്കുന്നത്. അന്തസ്സായി ജീവിക്കാനുള്ള വരുമാനം നെൽകൃഷിയിലൂടെ നേടാമെന്ന് അദ്ദേഹം കാണിച്ചു തരുന്നു. നാട്ടുകാരനും സുഹൃത്തുമായ ജോബിയാകട്ടെ, 13 വർഷത്തെ പ്രവാസജീവിതത്തിൽ സമ്പാദിച്ചതൊക്കെ നെൽപാടത്തു നിക്ഷേപിച്ച സാഹസികൻ. കുട്ടനാടൻ പാടത്ത് സമ്മിശ്രകൃഷിയും തുള്ളിനനയുമൊക്കെ നടപ്പാക്കി അധികാദായം നേടുന്ന ജോബിക്ക് മത്സ്യക്കൃഷിയും കോഴിവളർത്തലുമൊക്കെയുണ്ട്.