MOOC:വഴികൾ ഏറെ

"മൂക്' പഠനത്തിനു സഹായകമായ പ്ലാറ്റ്ഫോമുകൾ അറിയാം

- ബി.എസ്.വാരിയർ

താൽപര്യമുള്ള വിഷയങ്ങൾ ഏതു നേ രത്തും ഓൺലൈനായി പഠിക്കാൻ ആഗോളതല സൗകര്യമൊരുക്കുന്ന മാസീവ് ഓപ്പൺ ഓൺലൈൻ കോഴ്സുകളെക്കുറിച്ച് (MOOC) കഴിഞ്ഞയാഴ്ച സൂചിപ്പിച്ചല്ലോ. ഇവ ലഭ്യമാക്കുന്ന ധാരാളം പ്ലാറ്റ്ഫോമുകളുണ്ട്. ഏറെ പ്രചാരമുള്ള മികച്ച ചിലത് താഴെക്കൊടുക്കുന്നു.

edX

ലോകത്തിലെ മുൻനിര സർവകലാശാലകളായ യുഎസിലെ ഹാർവഡും മസച്ചുസെറ്റ്സ് ഇൻസ്റ്റിറ്റ്യൂട്ട് ഓഫ് ടെക്നോളജിയും (എംഐടി) ചേർന്നു തുടങ്ങിയത്. ബെർക്ലി, ബോൻ, മേരിലൻഡ്, കോർണൽ, ഡാർട്മൗത്ത്, ഓക്സ്ഫഡ്, ഇംപീരിയൽ കോളജ്, ക്വീൻസ്ലൻഡ് സർവകലാശാലകളടക്കം 160 സ്ഥാപനങ്ങളുടെ മൂവായിരത്തി അഞ്ഞൂറിലേറെ കോഴ്സുകൾ നൽകുന്നു. (ഇവിടെ കോഴ്സുകൾ എന്നതുകൊണ്ട് അർഥമാക്കുന്നതു വിഷയഭാഗങ്ങളാണ്). രണ്ടു കോടിയോളം പേർ പഠിക്കുന്നു.