കുറഞ്ഞ ചെലവിൽ മികച്ച കരിയർ കോസ്റ്റ് അക്കൗണ്ടൻസി

വെറും അക്കൗണ്ടൻസിയല്ല, കോസ്റ്റ് അക്കൗണ്ടൻസി. അതിനു ചുമതലകളും ആകർഷണീയതയും കൂടുതലുണ്ട്.

- ബി.എസ്.വാരിയർ

ചെയ്തു കഴിഞ്ഞ പ്രവർത്തനങ്ങളിലെ വരവു ചെലവു കണക്കുകൾ കൃത്യമായി കൂട്ടിയെടുക്കുകയും അതിൽ വന്നിട്ടുണ്ടാകാവുന്ന പിശകുകൾ ഓഡിറ്റിലൂടെ കണ്ടെത്തി തിരുത്തുകയുമാണ് സാധാരണ അക്കൗണ്ടൻസി ശ്രദ്ധിക്കുക. കോസ്റ്റ് അക്കൗണ്ടൻസി ഒരു പടികൂടിക്കടന്ന് ഭാവിയിലെ പ്രവർത്തനങ്ങളുടെ ചെലവ് കഴിവതും കുറച്ച് കാര്യക്ഷമത മെച്ചപ്പെടുത്താനുള്ള മാർഗങ്ങൾ ആവിഷ്കരിക്കുന്നു. അതുകൊണ്ടുതന്നെയാണ് "കോസ്റ്റ് & മാനേജ്മെന്റ് അക്കൗണ്ടൻസി' എന്ന പ്രയോഗം രൂപംകൊണ്ടത്.

ഇന്ത്യയിലും പുറത്തും

ഇന്ത്യയിൽ ഈ മേഖലയിലെ മുഴുവൻ കാര്യങ്ങളും നിയന്ത്രിക്കുന്ന സ്ഥാപനമാണ് ഇൻസ്റ്റിറ്റ്യൂട്ട് ഓഫ് കോസ്റ്റ് അക്കൗണ്ടന്റ്സ് ഓഫ് ഇന്ത്യ. കേന്ദ്ര സർക്കാർ നിയമപരമായി അധികാരപ്പെടുത്തിയിട്ടുള്ള സ്ഥാപനമാണിത്. (വിലാസം: CMA Bhavan, 3-Institutional Area, Lodhi Road. New Delhi-110 003; ഫോൺ: 011-246222156, വെബ്: https://icmai.in).

മിക്ക രാജ്യങ്ങളിലും പേര് ഇൻസ്റ്റിറ്റ്യൂട്ട് ഓഫ് കോസ്റ്റ് & മാനേജ്മെന്റ് അക്കൗണ്ടന്റ്സ് എന്നുതന്നെ. യുഎസിലെ CMA (Certified Management Accountant), യു കെ CIMA (Chartered Institute of Management Accountant) എന്നീ സമാനയോഗ്യതകൾ ഇന്ത്യയിൽത്തന്നെ പഠിച്ചു പരീക്ഷയെഴുതി നേടാൻ കഴിയും. പ്രാക്ടിസ് ചെയ്യുകയുമാവാം. പക്ഷേ, ഇന്ത്യയിൽ സർക്കാർ വ്യവസ്ഥ ചെയ്ത നിയമപരമായ അധികാരങ്ങൾ (Statutory Powers) വിദേശയോഗ്യതകൾക്ക് ഉണ്ടായിരിക്കില്ല.

ചുമതലകൾ