ഫോർമുല വൺ ഭൂമിയിലെ ബഹിരാകാശയാത്ര

'If you no longer go for a gap that exists, you are no longer a racing driver'

- ദാവൂദ് മുഹമ്മദ്

സാധാരണ ഡ്രൈവിങ്ങിൽ ഒരിക്കലും മാതൃകയാക്കരുതാത്ത ഈ ഉപദേശം ഫോർമുല വൺ കാറോട്ടത്തിലെ എക്കാലത്തെയും മികച്ച താരങ്ങളിലൊരാളായ ഡ്രൈവർ നിക്കി ലൗഡയുടേ ഓസ്ട്രിയൻ വിങ്ങും റേസ് ഡ്രൈവിങ്ങും തമ്മിലുള്ളതാണ്. അതുതന്നെയാണ് റോഡ് ഡ്രൈവിങ്ങും റേസ് ഡ്രൈവിങ്ങും തമ്മിലുള്ള വ്യത്യാസം. റോഡിലെ മത്സരയോട്ടം ജീവനുതന്നെ ഭീഷണിയാണ്. റേസിൽ വിജയിക്കണമെങ്കിൽ പക്ഷേ, മത്സരിച്ചോടിയേ മതിയാകൂ. അതു ലൈഫ് "റിസർവിൽ ' വച്ചിട്ടാണെങ്കിലും ഇങ്ങനെ ജീവൻ പണയം വച്ച് കാറിൽ ചീറിപ്പായുന്നവരുടെ സാഹസികത കൂടിയാണ് ഫോർമുല വൺ റേസിങ്ങിനെ ലോകത്തെ ഏറ്റവും ത്രസിപ്പിക്കുന്ന കായികവിനോദങ്ങളിലൊന്നാക്കി മാറ്റുന്നത്. ഒരു മീറ്ററിൽ താഴെ നീളവും അര മീറ്ററിൽ താഴെ വീതിയുമുള്ള കോക്പിറ്റിൽ കാലുകൾ മടക്കിയിരുന്ന് മണിക്കൂറിൽ 300 കിലോമീറ്റർ വേഗത്തിൽ കാറോടിക്കുമ്പോഴുള്ള ഫീൽ ഒരു ബഹിരാകാശയാത്രയ്ക്കു സമാനം. ഒപ്പം അത്രത്തോളം അപകടകരവും. കണ്ണും മനസ്സും ഒന്നു പതറിയാൽ കൈവിട്ടു പോകുന്നത് ജീവിതം തന്നെയാകും. അതിനെ ധീരമായി അതിജീവിച്ചവരുടെയും വീണുപോയവരുടെയും കഥ കൂടിയാണ് ഫോർമുല വൺ.

പെലെയെ പിന്നിലാക്കിയ സെന്ന

ലോക കായികഭൂപടത്തിൽ ബ്രസീലിന്റെ മേൽവിലാസം ഫുട്ബോൾ ആണ്. എന്നാൽ ഫുട്ബോളിലെ സൂപ്പർതാരങ്ങൾ വരെ ആരാധിക്കുന്ന ഒരു റേസിങ് താരം അവർക്കുണ്ട്. 1994 മേയ് ഒന്നിന് ഇറ്റലിയിലെ ഇമോള സർക്യൂട്ടിൽ പൊലിഞ്ഞുപോയ അയർട്ടൻ സെന്ന. മരണപ്പെട്ട് മൂന്നു പതിറ്റാണ്ടിനു ശേഷവും ഫോർമുല വണ്ണിലെ “കൾട്ട് താരം' ആയി തുടരുന്നു സെന്ന. അതിനു കാരണം 34-ാം വയസ്സിൽ ജീവിതത്തോടു വിടപറയും മുൻപ് സെന്ന കാണിച്ച മാതൃകകൾ തന്നെ. ഫ്രഞ്ച് ഡ്രൈവർ അലെയ്ൻ പോസ്റ്റുമായുള്ള കടുത്ത മത്സരമാണ് ട്രാക്കിൽ സെന്ന എന്ന കായികതാരത്തെ ശ്രദ്ധേയനാക്കിയതെങ്കിൽ ഒപ്പം മത്സരിക്കുന്നവരോടുള്ള കരുതലാണ് സെന്ന എന്ന മനുഷ്യനെ അനശ്വരനാക്കിയത്. അതിനു സാക്ഷ്യം നിൽക്കാനാവുന്ന ഒരാൾ ഫ്രഞ്ച് ഡ്രൈവർ എറിക് കോമാ ആണ്.