സ്പോർട്സ് കാർ പെർഫോമൻസുമായി ജിഎൽസി

421 ബിഎച്ച്പി കരുത്തുമായി എഎംജി ജിഎൽസി 43 ഫോർ ഡോർ കൂപ്പെ

- നോബിൾ എം. മാത്യു

സ്പോർട്സ് കാറിന്റെ പെർഫോമൻസും എസ് യു വിയുടെ പ്രകടനക്ഷമതയും കൂപ്പെയുടെ ഡിസൈൻ മികവും ഒത്തുചേർന്നൊരു വാഹനം; അതാണ് മെഴ്സിഡീസ് എഎംജി ജിഎൽസി 43 കൂപ്പെ, എഎംജി സി 43 സ്പോർട്സ് സെഡാന്റെ എവി പതിപ്പെന്നോ ജിഎൽസി എവിയുടെ എഎംജി കുപ്പ വകഭേദമെന്നോ വിളിക്കാവുന്ന ഒരു ഇടിവെട്ട് ഐറ്റം. കോട്ടയത്തുനിന്നും പുള്ളിക്കാനം വാഗമൺ വഴി ഈ കരുത്തനുമായൊന്നു പോയിവരാം.

പെർഫോമൻസാണ് മെയിൻ

എസ് യു വിയുടെ മാസ് ലുക്കും കൂപ്പെയുടെ മാദകത്വവും സമന്വയിക്കുന്ന സൃഷ്ടിയെങ്കിലും ബൂട്ടിലെ എഎംജി എന്ന ബാഡ്ജിങ്ങാണ് ഇവനെ സവിശേഷമാക്കുന്നത്. കനമേറിയ ഡോർ തുറന്ന് കോക്പിറ്റിനോടു സമാനമായ സീറ്റിൽ കയറി ഇരുന്നാൽ ജിഎൽസി ചോദിക്കും ഏതു മോഡ് വേണമെന്ന്!.

സ്റ്റീയറിങ്ങിലെ ചെറിയ ഡയൽ തിരിച്ചാൽ ആറു മോഡുകളിൽ ഇഷ്ടമുള്ളത് സെറ്റ് ചെയ്യാം. കാർബൺ ഫൈബർ ഫിനിഷുള്ള സ്റ്റീയറിങ്ങിൽ മുറുകെപ്പിടിക്കുമ്പോൾ സ്പോർട് മോഡ് തന്നെയേ മനസ്സിൽ വരൂ. എന്നാൽ നിങ്ങൾ ഒരു പ്രൊ ഡ്രൈവറാണെങ്കിൽ റേസ് മോഡ് എന്നൊന്നു കൂടിയുണ്ടിതിൽ. സ്പോർട് മോഡിലേക്കും സ്പോർട് പ്ലസ്, റേസ് മോഡിലേക്കും മാറ്റുമ്പോൾ തന്നെ എക്സോസ്റ്റിന്റെ സ്വരം കനക്കുന്നത് അറിയാൻ കഴിയും. കുതിക്കാൻ വെമ്പുന്ന 4 സിലിണ്ടർ 2 ലീറ്റർ എൻജിന്റെ മുരൾച്ച സിരകളിലൂടെ ഒരു തരിപ്പ് പടർത്തും. ഡ്രൈവ് മോഡിലിട്ട് ആക്സിലറേറ്ററിൽ കാലമർത്തുമ്പോൾ എഎംജി ജിഎൽസിയുടെ ഒരു കുതിപ്പുണ്ട്... സീറ്റിലിരിക്കുന്നവരെ പിന്നോട്ടു പായിച്ച് 421 കുതിരകളുടെ ശക്തിയിലുള്ള കുതിപ്പിൽ അറിയാതെ പറഞ്ഞുപോകും വൗ എന്ന്. പിന്നിലെ ഇരട്ട സൈലൻസറിൽ നിന്നു പുറത്തേക്കു വരുന്ന ശബ്ദത്തിനു ഗർജനമെന്നു വിശേഷിപ്പിച്ചാൽ മതിയാകില്ല. ഗിയർഡൗൺ ചെയ്യുമ്പോഴുള്ള സൗണ്ട്, അതു നൽകുന്ന ഹരം ചെറുതല്ല. സ്റ്റീയറിങ്ങിലെ ബട്ടൺ വഴി എഎംജി എക്സോസ്റ്റ് സിസ്റ്റം ആക്ടിവേറ്റ് ചെയ്യാനും ഓഫ് ചെയ്യാനും പറ്റും. ജിഎൽ 53യിലുള്ള പെർഫോമൻസ് വേരിയബിൾ എക്സോസ്റ്റല്ല. പക്ഷേ, സൗണ്ട് അത് ഒന്നൊന്നര സംഗതിയാണ്. 0-100 വേഗത്തിലെത്താൻ 4.8 സെക്കൻഡ് സമയം മതി ഇവന്.