Pookie പൂമ്പാറ്റ

ക്ലാസ് ടീച്ചറോട് പറയാതെ ക്ലാസിൽ നിന്ന് ഇറങ്ങിപ്പോയ കുസൃതി കുട്ടിയാണ് സർവ്വം മായ എന്ന സിനിമയിലൂടെ ഇഷ്ടം വാരിക്കൂട്ടുന്നത്

- രാഖി റാസ്

തിരുവനന്തപുരം നഗരത്തിലെ ഒരു രണ്ടാം ക്ലാസ് ടീച്ചർ ക്ലാസെടുക്കുന്നു. അപ്പോഴതാ ഒരു പൂമ്പാറ്റ ക്ലാസ് മുറിയുടെ വാതിൽക്കലെത്തി തന്റെ വൈബിന് ചേർന്ന ഒരാളെ ചിറകടിച്ചു വിളിക്കുന്നു. അതു കാണേണ്ട താമസം ക്ലാസിലെ പൂമ്പാറ്റ ക്ലാസിനെയും ടീച്ചറെയും മറന്നു പുറത്തേക്ക് ഒറ്റപ്പോക്ക്...

ക്ലാസിലെ പൂമ്പാറ്റ മൂന്നിലേക്കും നാലിലേക്കും ജയിച്ചു. സ്വഭാവത്തിനു യാതൊരു മാറ്റവും വന്നില്ല. കാറ്റ്, മഴ, പൂക്കൾ, കിളികൾ ഒക്കെ അവളെ പിന്നെയും പിന്നെയും വിളിച്ചിറക്കിക്കൊണ്ടു പോയി...ക്ലാസ് ടീച്ചറോട് പറയാതെ ക്ലാസിൽ നിന്ന് ഇറങ്ങിപ്പോയ ആ കുട്ടിയാണ് സർവ്വം മായ എന്ന സിനിമയിലെ ഡെലുലുവായി ഇഷ്ടം വാരിക്കൂട്ടുന്നത്. റിയ ഷിബു എന്ന സ്വന്തം പേര് പോലും അവൾ മറന്നു പോകുന്നത്ര ഇഷ്ടം...

ക്ലാസിൽ നിന്ന് ഇറങ്ങിപ്പോയ ശേഷം എന്തുണ്ടായി ?

എട്ടാം ക്ലാസ് വരെ ഞാനീ പരിപാടി തുടർന്നു. പപ്പയും അമ്മയും നൈസ് ആയി ഡീൽ ചെയ്തു. ഒൻപതാം ക്ലാസിൽ അവരെന്നെ ഹോസ്റ്റലിലാക്കി. അതോടെ നിയന്ത്രണങ്ങൾ ഇഷ്ടമില്ലാത്ത ഞാൻ കടുത്ത നിയന്ത്രണത്തിലായി.

ഫിലിം പ്രൊഡ്യൂസറായ പപ്പ ഷിബു തമീൻസിന്റെ ജോലി സൗകര്യത്തിനായാണു തിരുവനന്തപുരത്തു നിന്നു ഞങ്ങൾ ചെന്നൈയിലേക്കു താമസം മാറുന്നത്. ഉമ്മ മുംതാസും ബിസിനസ്സിൽ സഹകരിക്കുന്നുണ്ട്. എന്നെ സേലത്തെ മോണ്ട് ഫോർട് സ്‌കൂളിൽ ബോർഡിങ്ങിലാക്കി. സ്വന്തം കാര്യം സ്വയം ചെയ്യാൻ ശീലിപ്പിക്കുകയായിരുന്നു ലക്ഷ്യം. മോണ്ട് ഫോർട്ടിലെ ഇംഗ്ലിഷ് ടീച്ചറാണ് റിയ... നിന്റെ ശബ്ദം വളരെ നല്ലതാണ്' എന്നാദ്യം പറയുന്നത്. അതോടെ ഞാൻ സ്കൂൾ നാടകങ്ങളിൽ പങ്കെടുക്കാൻ തുടങ്ങി. ടീച്ചർ എന്നെ പ്രസംഗിക്കാനും പ്രേരിപ്പിച്ചു.

അന്നു മുതൽ സ്കൂളിലെ സ്ഥിരം മാസ്റ്റർ ഓഫ് സെറിമണി' (പരിപാടികളുടെ അവതാരക) ഞാനായി. ടീച്ചർ പറയുമായിരുന്നു “റിയ യു ആർ എ സ്റ്റാർ'.

ടീച്ചറുടെ വാക്കുകൾ സത്യമായല്ലോ ?