മാറ്റില്ല സിനിമയോടുള്ള മോഹവും നിലപാടും

സിനിമയെ അത്രയ്ക്കിഷ്ടമുള്ള ഒരാൾ സിനിമയ്ക്കുള്ളിലെ അനീതികൾക്കെതിരെ നിലപാടെടുത്താൽ എന്താണു സംഭവിക്കുക - റിമ പറയുന്നു

- വിജീഷ് ഗോപിനാഥ്

ഒരു ബെസ്റ്റ് ആക്ടറെസ്സ് അവാർഡ് കിട്ടിയിട്ടുണ്ട് എനിക്ക് ആരെങ്കിലും അതിനെക്കുറിച്ച് എന്നോട് ചോദിച്ചോ? ഞാനൊരു ആർടിസ്റ്റ് ആണ് ആദ്യം അതെല്ലാവരും മറന്നു പോയി എന്നുള്ളതുണ്ടല്ലോ, ആ പോയിന്റിലാണ് ഞാൻ നിൽക്കുന്നത് ലൈഫിൽ, അത്രയേ എനിക്ക് പറയാനുള്ളൂ.'' മികച്ച നടിക്കുള്ള കേരള ഫിലിം ക്രിട്ടിക്സ് അവാർഡ് വാങ്ങിയ ശേഷം റിമ പറഞ്ഞ വാക്കുകളാണിത്. മാധ്യമ പ്രവർത്തകരുടെ ചോദ്യങ്ങളെല്ലാം സിനിമയിലെ പോരാട്ടങ്ങളെക്കുറിച്ചു മാത്രമായപ്പോൾ റിമയുടെ മറുചോദ്യമായിരുന്നു അത്.

മിസ് കേരള മത്സരത്തിന്റെ റാംപിൽ നിന്നിറങ്ങി 16 വർഷം മുൻപ് സിനിമയിലേക്ക് എത്തുമ്പോൾ സമരനായിക എന്ന റോളിലേക്കു മാത്രം ഒതുങ്ങിപ്പോകുമെന്നു റിമ കരുതിയില്ല. മികച്ച നടിക്കുള്ള സംസ്ഥാന സർക്കാരിന്റേതുൾപ്പടെയുള്ള പുരസ്കാരങ്ങൾ, മാമാങ്കം ഡാൻസ് കമ്പനിയിലൂടെ ലോകത്തെ പേരെടുത്ത വേദികളിൽ ചുവടു വച്ചത്, സിനിമാ നിർമാതാവായത് എല്ലാം മാഞ്ഞു പോവുകയും സിനിമയിലെ ചൂഷണങ്ങൾക്കെതിരേ സംസാരിക്കേണ്ട ആൾ എന്ന മുഖം മാത്രമായി മാറുകയും ചെയ്തു.

സിനിമയിലെ ജീവിതത്തെക്കുറിച്ചു റിമ പറഞ്ഞിടത്തു നിന്നു തുടങ്ങാം...

ഞാനത് ആലോചിച്ചു പറഞ്ഞതൊന്നുമല്ല. മീഡിയയെ കുറ്റപ്പെടുത്തിയതും അല്ല. ആ സന്ദർഭത്തിലുണ്ടായ നിരാശയിൽ നിന്നാണ് അങ്ങനെയൊരു ചോദ്യം വന്നത്. ഈ വർഷം തിയറ്റർ' എന്ന സിനിമയിൽ അഭിനയിക്കാൻ സാധിച്ചു. അതിലെ അഭിനയത്തിനു മികച്ച നടിക്കുള്ള ഫിലിം ക്രിട്ടിക്സ് അവാർഡ് കിട്ടി. അതൊരു ചെറിയ കാര്യമായി തോന്നിയില്ല. ആ അവാർഡ് വാങ്ങി വേദിയിൽ നിന്നു പുറത്തേക്കു വന്നപ്പോഴാണ് അതേക്കുറിച്ച് ഒരു ചോദ്യം പോലും ഉണ്ടാകാതിരുന്നത്.

അവരുടെ ചോദ്യങ്ങളൊന്നും പ്രസക്തമല്ല എന്നല്ല. ഇതിപ്പോൾ പത്തു വർഷമായി ഒരേ ചോദ്യം ഒരേ ഉത്തരം പറഞ്ഞു കൊണ്ടിരിക്കുകയാണ്. അത്തരം ചോദ്യങ്ങൾക്ക് മറുപടി നൽകേണ്ട ഉത്തരവാദിത്തമുണ്ട് താനും. എന്നാലും അതു മാത്രമല്ലല്ലോ എന്റെ വ്യക്തിത്വം. അതോർക്കുമ്പോൾ നടി എന്ന രീതിയിൽ നിരാശ തോന്നും.

തിയറ്റർ സിനിമ എങ്ങനെയാണു പ്രിയപ്പെട്ടതാവുന്നത്?