ഓഫ് ആക്കാം പ്രഷർകുക്കർ

ഒക്ടോബർ 10, ലോക മാനസികാരോഗ്വ ദിനം. വർക് പ്ലേസ് മെന്റൽ വെൽബിയിങ് ആണ് ഈ വർഷത്തെ ആശയം. സമ്മർദം അകറ്റി ജോലിയിൽ നമുക്കു മാനസിക സ്വാസ്ഥ്യം ഉറപ്പാക്കാം

- രൂപാ ദയാബ്ജി

മഹാരാഷ്ട്രയിലെ ബഹുരാഷ്ട്ര കമ്പനിയിൽ ജോലി ചെയ്തിരുന്ന 27 വയസ്സുള്ള അന്ന സെബാസ്റ്റ്യൻ. ഈ പേര് എല്ലാവരും ഓർക്കണമെന്നില്ല. ജോലിസമ്മർദം കൊണ്ടുണ്ടായ ഹൃദയ സ്തംഭനത്താൽ മരിച്ച മലയാളി പെൺകുട്ടി എന്നു പറഞ്ഞാൽ അന്നയെ എല്ലാവരും അറിയും.

2023 ജനുവരിയിൽ ഡിലോയ്റ്റ് നടത്തിയ സർവേയെക്കുറിച്ചു കഴിഞ്ഞ ലക്കത്തിൽ പറഞ്ഞിരുന്നു. ജോലി ചെയ്യുന്ന 53 ശതമാനത്തോളം ഇന്ത്യൻ സ്ത്രീകൾ ഉയർന്ന സ്ട്രെസ് (സമ്മർദം കൊണ്ടുനടക്കുന്നുണ്ടത്രേ. അതിൽ 30 ശതമാനം പേർ ജോലി കാരണം ബേൺ ഔട്ട് ആകാറുണ്ട്.

ബേൺ ഔട്ടും ജോലി സംബന്ധമായ സ്ട്രസ്സും ലോക വ്യാപകമാണെങ്കിലും ഇന്ത്യൻ സ്ത്രീകളിൽ അതു കൂടുന്നതിനു പിന്നിൽ കുടുംബത്തിൽ നിന്നുള്ള സമ്മർദമടക്കം നിരവധി കാരണങ്ങളുണ്ട്. അതുകൊണ്ടുതന്നെ ഇവരിൽ ഹൃദയാഘാത സാധ്യത 21 ശതമാനം കൂടുമത്രേ.

ജോലി രോഗിയാക്കുമോ എന്നു നമ്മളും ഈ ടാർഗറ്റ് 'പണി'യാകുമോ എന്നു തൊഴിലുടമയും ചിന്തിച്ചു തുടങ്ങുമ്പോൾ ചോദ്യങ്ങൾ അനവധി ബാക്കിയുണ്ട്. എന്തൊക്കെയാണു ജോലിയിൽ സമ്മർദമുണ്ടാക്കുന്നത്? അവ എങ്ങനെ തിരിച്ചറിയാം? അവയെ പ്രതിരോധിക്കുന്നതെങ്ങനെ? വിശദമായി പറഞ്ഞു തരുന്നു എറണാകുളം മെഡിക്കൽ ട്രസ്റ്റ് ഹോസ്പിറ്റലിലെ സീനിയർ സൈക്യാട്രിസ്റ്റായ ഡോ.സി.ജെ. ജോണും ലൈഫ്സ്റ്റൈൽ, മോട്ടിവേഷണൽ വിദഗ്ധനായ അഭിഷാദ് ഗുരുവായൂരും.

എവിടെയാണു പ്രശ്നം?

ജോലി സമ്മർദം സംബന്ധിച്ച ചർച്ചകളെല്ലാം ഐടി, ബാ ങ്ക് മേഖലകളിൽ ചുറ്റിക്കറങ്ങി നിൽക്കുകയാണ്. പക്ഷേ, തൊഴിൽ മേഖല ഏതായാലും തൊഴിലാളി അഭിമുഖീകരിക്കേണ്ടി വരുന്ന പൊതു വെല്ലുവിളിയാണു തൊഴിൽ സമ്മർദം. ടാർഗറ്റ്, ഡെൻ അധിഷ്ഠിതമായി ജോലി ചെയ്യുന്നവരിൽ അതിന്റെ ആഘാതം കുറച്ചു കൂടുമെന്നു മാത്രം.

ഇവ ഇല്ലാത്ത തൊഴിലാണല്ലോ പൊലീസ് സേന. അവിടെ സമ്മർദമില്ല എന്നാണോ ? മാറിയ സാഹചര്യത്തിൽ കുട്ടികളുടെ പഠന പ്രശ്നങ്ങൾ മുതൽ ക്ലസ്റ്റർ മീറ്റിങ്ങും മറ്റുമൊക്കെയായി അധ്യാപകർ വരെ സമ്മർദത്തിലല്ലേ? പല ഘടകങ്ങൾ ചേർന്നാണു തൊഴിൽ സമ്മർദം ഉണ്ടാക്കുന്നത് എന്നു പറയാം. രോഗാണുബാധയെ സംബന്ധിച്ചു കമ്യൂണിറ്റി മെഡിസിനിലുള്ള ഒരു പ്രമാണം ഇതാണ്. ഏജന്റ് - ഹോസ്റ്റ് ആൻഡ് എൻവയോൺമെന്റ്.