ഇനി നിങ്ങൾക്കുള്ളതാണ് ലോകം

“സ്ത്രീകൾ മുന്നേറുന്ന ലോകത്തു സ്വയം മെച്ചപ്പെടുത്താൻ പുരുഷന്മാർ കഠിനമായി പോരാടേണ്ടി വരും ശശി തരൂരിനൊപ്പം വനിത ഒരുക്കിയ ക്യാംപസ് സംഗമം

- ടെൻസി ജെയ്ക്കബ് 

എന്തുകൊണ്ടോ ജനങ്ങൾക്ക് ഇഷ്ടമാണു ശശി തരൂരിലെ നേതാവിനെ. അതുകൊണ്ടു തന്നെ ഒരുപാടു പ്രതീക്ഷകളും അവർക്കുള്ളിലുണ്ട്. കടുകട്ടിയായ പുത്തൻവാക്കുകൾ പറഞ്ഞു വിഭ്രമിപ്പിക്കുമ്പോഴും രാജ്യാന്തരവിഷയങ്ങളിൽ ഉൾക്കാഴ്ചകൾ പങ്കുവയ്ക്കുമ്പോഴും ഉറച്ച നിലപാടുകളോടെ രാഷ്ട്രീയം പറയുമ്പോഴും എഴുത്തിൽ പുതിയ ലോകങ്ങൾ തുറന്നു കാട്ടുമ്പോഴുമെല്ലാം എതിർക്കുന്നവർക്കു പോലും പ്രിയപ്പെട്ടവനാകുന്നു തരൂർ.

വിവാദങ്ങളും വിമർശനങ്ങളും ട്രോളുകളുമൊക്കെ എപ്പോഴും കൂട്ടിനുണ്ട്. പക്ഷേ, തരൂരിന്റെ ചുണ്ടിലെ ചിരി മായാറില്ല. തിരക്കേറിയ പകലിൽ വനിത ഒരുക്കിയ ക്യാംപസ് കൂട്ടായ്മയിൽ പങ്കെടുക്കാൻ വന്നപ്പോഴും അതേ ചിരിയുണ്ട്, വാക്കുകളിൽ കുസൃതിയുണ്ട്, കണ്ണുകളിൽ പ്രതീക്ഷയുണ്ട്.

തരൂരോസോറസ്' എന്ന പുസ്തകത്തിൽ പറഞ്ഞിരിക്കുന്നതു പോലെ കടുകട്ടി വാക്കുകളാണോ ഞങ്ങളോടുള്ള സംഭാഷണത്തിലും പ്രയോഗിക്കുന്നത് എന്നായിരുന്നു കുട്ടികളുടെ പ്രധാന സംശയം.

ചിരി വിടാതെ തന്നെ തരൂർ പറഞ്ഞു. ഞാൻ ദൈനംദിന ജീവിതത്തിൽ ഉപയോഗിക്കുന്ന വാക്കുകളൊന്നുമല്ല അവ. ആവശ്യമുള്ളപ്പോൾ എന്റെ സംഭാഷണത്തിൽ കടന്നു വരുന്നവയാണ്. അതൊന്നും അസാധാരണവും സങ്കീർണവുമായ വാക്കുകളൊന്നുമല്ല കേട്ടോ.എന്നാൽ നിങ്ങളുടെ പദസമ്പത്തു വർധിപ്പിക്കാൻ ആ വാക്കുകൾ സഹായിക്കും...

കുട്ടിക്കാലത്തു പഠനത്തിൽ മാത്രം പൂർണമായും മുഴുകിയിരുന്ന ആളാണെന്നു കേട്ടിട്ടുണ്ട്. അതു പിന്നീടുള്ള ജീവിതത്തിൽ ഉപകാരപ്രദമായോ?

ഇപ്പോഴത്തെ കാലഘട്ടം വച്ചു നോക്കുമ്പോൾ അക്കാലത്തു കുറേ പരിമിതികളുണ്ടായിരുന്നു. ടെലിവിഷൻ, ഫോൺ, ഇന്റർനെറ്റ് തുടങ്ങി ശ്രദ്ധ തിരിക്കുന്ന സംഗതികളൊന്നുമില്ല. പഠനത്തിലായിരുന്നില്ല, വായനയിലാണു ഞാൻ കൂടുതലും മുഴുകിയത്. കുട്ടിക്കാലത്ത് എനിക്ക് ആസ്മ ഉണ്ടായിരുന്നു. പുറത്തു പോയി കളിക്കാനാകാതെ ശ്വാസത്തിന്റെ താളംതെറ്റലുകളുമായി കിടക്കയിൽ കിടക്കുന്ന ഒരു കുട്ടി നേരം പോക്കാൻ എന്തു ചെയ്യും ? വായനയായിരുന്നു എല്ലാം വായിച്ചു വായിച്ചാണു നന്നായി എഴുതാനും സംസാരിക്കാനും പഠിച്ചത്. അതിലൂടെ ലോകത്തെ കണ്ടു പിടിക്കാനും ശ്രമിച്ചു.

വായിച്ച പുസ്തകങ്ങളിൽ നിന്നു പ്രചോദനമേകിയ ഒരു സ്ത്രീ കഥാപാത്രം ഉണ്ടോ?