பெருகும் போதை சமூகம்...ஏன்?

இந்த உலகில் வறுமை, வன்முறையை விடக் கொடுமை போதை. ஏனெனில், போதை வன்முறையையும் வறுமையையும் வலிய வரவழைத்துவிடும்.

- பரிதி

எனவேதான் போதை இல்லாத சமூகம் காணவேண்டுமென்று ஞானிகள் விழைந்தனர்.

ஆனால், நம் அரசியல் தலைவர்களோ, போதை விற்பனைக்கு சட்டப்படி ஏற்பாடு செய்துவிட்டு, போதை ஒழிப்புக்கு சமுதாய விழிப்புணர்வு செய்கின்றனர்.

டெல்லியில் 'போதைப் பொருள் கடத்தல் மற்றும் தேசிய பாதுகாப்பு' சிறப்பு மாநாடு நடைபெற்றது. இந்த மாநாட்டுக்கு தலைமை வகித்து பேசிய ஒன்றிய உள்துறை அமைச்சர் அமித் ஷா, “கடந்த 2024ஆம் ஆண்டில் நாடு முழுவதும் ரூ.16,914 கோடி மதிப்பிலான போதைப்பொருட்கள் கைப்பற்றப்பட்டன. கடந்த இரண்டு வாரங்களில் மட்டும் நாடு முழுவதும் சுமார் ரூ.8,600 கோடி மதிப்பிலான போதைப் பொருட்கள் பறிமுதல் செய்யப்பட்டு, அழிக்கப்பட்டுள்ளன.

இந்தியாவில் சுமார் 7 சதவீதம் பேர் போதைப்பொருட்களை பயன்படுத்தி வருகின்றனர். அவர்களை போதைப் பழக்கத்தில் இருந்து மீட்க வேண்டும். போதைப்பொருள் பழக்கம் அடுத்த தலைமுறையை அழிக்கும் புற்றுநோய் ஆகும். இந்த சமூக அவலத்தை நாம் தோற்கடிக்க வேண்டும்” என்று அழைப்பு விடுத்துள்ளார்.

போதைக்கடத்தல் கடந்த சில ஆண்டுகளாக, குறிப்பாக பாஜக ஆட்சிக்காலத்தில் அதிகரித்து வருகிறது, அதையே அமித்ஷா ஒப்புக்கொண்டும் உள்ளார். பல்வேறு தீவிரவாத குழுக்கள் போதைப்பொருட்கள் கடத்தலில் ஈடுபட்டு வருகின்றன என்று அவர் பேச்சில் குறிப்பிட்டுள்ளார். அதேவேளை, இந்த ஆண்டு தீவிர வாத இயக்கங்கள் இல்லாத நாடாக நம் நாட்டை மாற்றப்போவதாக கூறியுள்ளார். தீவிரவாதத்தோடு போதையும் ஒழிந்தால் சரி.

ஆனால், தீவிர வாதிகள் மட்டும் அல்லர், அரசியல் செல்வாக்கு மிக்க குற்றவாளிகளும் போதைக்கடத்தலில் சாம்ராஜ்யம் நடத்துவதை அவர்கள் மறைப்பது அழகல்ல. ஒன்றியத்திலும் மாநிலங்களிலும் அவ்வாறான அரசியல் புள்ளிகளிடமிருந்து பல்லாயிரக்கணக்கான ரூபாய் மதிப்பில் போதைப்பொருள் பிடிபட்டுள்ளது.

“போதைப்பொருட்கள் கடத்தலுக்கு கிரிப்டோகரன்சி முறையில் பணப் பரிமாற்றம் நடைபெறுகிறது. சர்வதேச அளவிலான ஆன்லைன் சந்தைகள் மூலம் போதைப்பொருட்கள் வாங்கப்பட்டு, இந்தியாவுக்கு கடத்தப்படுகிறது, போதைப் பொருட்கள் கடத்தலுக்கு ட்ரோன்கள் அதிக அளவில் பயன்படுத்தப்படுகின்றன.