വിദ്യ പകർന്ന് ദിവ്യ

ലോകവിപണി കീഴടക്കിയ മലയാളിപ്പേരാണ് ബൈജൂസ്. അമരത്ത് വിദ്യയുടെ വെളിച്ചം പകർന്ന് ദിവ്യയുണ്ട്

- സുനിൽ തിരുവമ്പാടി

12: -ാം ക്ലാസ്സിൽ ഉന്നത വിജയം നേടിയ പെൺകുട്ടി. നല്ല മാർക്ക് നേടിയാൽ എഞ്ചിനീയറിങ് എന്ന നാട്ടുനടപ്പിൽ അവളും ബി.ടെക്ക് നേടി. അതുകഴിഞ്ഞ് തുടർപഠനം വിദേശത്ത്. ഇങ്ങനെ കൃത്യമായ പ്ലാനിങ്ങിൽ മുന്നോട്ടുപോയ ജീവിതം മാറിമറിഞ്ഞത് പെട്ടെന്നായിരുന്നു. പഠനത്തോടൊപ്പം പഠിപ്പിക്കാനും തുടങ്ങിയ ആ പെൺകുട്ടി ഇന്ന് ലോകം മുഴുവൻ വിദ്യാർഥികളുള്ള ഒരു അധ്യാപികയാണ്. ലോകത്തിലെ ഏറ്റവും വലിയ എഡ് ടെക് കമ്പനിയായി വളർന്ന ബൈജൂസി'ന്റെ നേതൃനിരയിൽ ഇന്ന് ബെംഗളൂരുകാരിയുണ്ട്. കേരളത്തിന്റെ മരുമകളും ബൈജുസി'ന്റെ സ്ഥാപകൻ ബൈജു രവീന്ദ്രന്റെ ഭാര്യയുമായ ദിവ്യ ഗോകുൽനാഥ്. കമ്പനിയുടെ കോ ഫൗണ്ടറും ഡയറക്ടറുമാണ് ദിവ്യ.

മാറിമറിഞ്ഞ ജീവിതം

ഞാൻ ഒറ്റമകളായിരുന്നു. അച്ഛൻ ഡോക്ടർ, അമ്മ ദൂരദർശനിൽ പ്രോഗ്രാമിങ് എക്സിക്യൂട്ടീവും. ജനിച്ചതും വളർന്നതുമെല്ലാം ബെംഗളൂരുവിൽ. ആർമിയുടെ താമസസ്ഥലത്തായിരുന്നു ഞങ്ങളും. അതുകൊണ്ടു തന്നെ പലദേശത്തു നിന്നുമെത്തിയവർ സുഹൃത്തുക്കളായി. പല ഭാഷകളും സംസ്കാരവും കണ്ടു പഠിച്ചു. ആൺപെൺ ഭേദമില്ലാതെ ഞാൻ വളരണമെന്ന് അച്ഛനും അമ്മയ്ക്കും നിർബന്ധമായിരുന്നു. മൂന്ന് വയസ്സിന് ശേഷം ജിംനാസ്റ്റിക്സും നീന്തലും പഠിച്ചു. മുത്തശ്ശനും മുത്തശ്ശിയും ഞങ്ങൾക്ക് ഒപ്പമുണ്ടായിരുന്നു. അവരോടായിരുന്നു കൂടുതൽ അടുപ്പം. അച്ഛൻ ഡോക്ടറായതിനാൽ ഞാനും ഡോക്ടറാകുമെന്നാണ് എല്ലാവരും കരുതിയത്. പക്ഷേ അതു നടന്നില്ല. ഞാൻ എഞ്ചിനീയറിങ്ങാണ് തിരഞ്ഞെടുത്തത്. അടുത്ത ബന്ധു യു.എസ്സിൽ ഉണ്ടായിരുന്നു. ഉന്നത പഠനത്തിന് അവിടേക്ക് പോകാനാണ് പ്ലാനിട്ടിരുന്നത്. പ്രവേശന പരീക്ഷയ്ക്കുള്ള തയ്യാറെടുപ്പിന് വേണ്ടിയാണ് ബൈജുവിന്റെ ക്ലാസ്സിലെത്തിയത്. 2007 ലായിരുന്നു അത്. ജീവിതം മാറി മറിഞ്ഞത് അവിടെ വച്ചാണ്.

ബൈജുവിന്റെ ക്ലാസ്സുകൾ

 ബൈജു എത്ര ലളിതമായായിരുന്നു ക്ലാസുകൾ എടുത്തിരുന്നതെന്നോ. ആ ബഹുമാനത്തിൽ ഞാൻ ഇപ്പോഴും സർ എന്നാണ് ബൈജുവിനെ വിളിക്കുന്നത്. പഠനത്തിന്റെ ഇടവേളകളിൽ ഞാൻ ചോദ്യങ്ങൾ ചോദിക്കുമായിരുന്നു. ബൈജു ലളിതമായി ഉത്തരങ്ങൾ വിവരിച്ച് മനസ്സിലാക്കിത്തരും. ഇതിനിടെയാണ് ടീച്ചിങ്ങിലേക്ക് ക്ഷണിച്ചത്. എന്തുകൊണ്ട് പഠിപ്പിച്ചു കൂടാ?' എന്ന് ബൈജു ചോദിച്ചു. കോളേജിൽ പഠിക്കുമ്പോൾ കൂട്ടുകാർക്ക് ക്ലാസ്സെടുത്തിരുന്നു. ആ അനുഭവത്തിന്റെ പിൻബലത്തിൽ ബൈജുവിനൊപ്പം ടീച്ചിങ്ങിലേക്കെത്തി.