സന്തോഷം തരും വഴികൾ

ഈ പുതുവർഷം നമ്മുടെയും ഒപ്പം ചേർന്നു നിൽക്കുന്നവരുടെ ജീവിതത്തിൽ സന്തോഷം നിറയ്ക്കുന്നതാക്കാം... അതിനായി ചില പുതുവഴികൾ

-  റോസ് മരിയ വിൻസെന്റ്

മനുഷ്യന്റെ ഏറ്റവും വലിയ ആഗ്രഹമാണ് അല്ലലുകളൊന്നുമില്ലാത്ത സന്തോഷത്തോടെയുള്ള ജീവിതം. എന്താണ് സന്തോഷം? അതെങ്ങനെ കണ്ടെത്തും? എക്കാലത്തെയും ചോദ്യമാണിത്. ദുഃഖവും നിന്നിലാണ്, ദുഃഖകാരണവും നിന്നിലാണ്, ദുഃഖത്തിൽ നിന്നും സന്തോഷത്തിലേക്കുള്ള വഴിയും നിന്നിൽ തന്നെ സന്തോഷം കണ്ടെത്താനുള്ള വഴി തിരയുന്നവനോടുള്ള ബുദ്ധവചനം ഇങ്ങനെ. അതേസമയം, സന്തോഷം തോന്നുക എന്നത് സ്ഥാനക്കയറ്റമോ കൂടുതൽ പണം നേടുന്നതോ ആയ ബാഹ്യവഴികളിലൂടെയൊന്നും സംഭവിക്കുന്നതല്ല എന്ന് ശാസ്ത്രം. സുഖം നൽകുന്ന സംവേദനങ്ങൾ (Pleasant sensatiosn) വഴി ശരീരത്തിൽ നടക്കുന്ന ജൈവപ്രക്രിയയെന്നാണ് ഇസ്രായേലി ചരിത്രകാരൻ യുവാൽ നോഹ ഹരാരി തന്റെ "ഹോമോഡസ്' എന്ന പുസ്തകത്തിൽ അഭിപ്രായപ്പെടുന്നത്. എന്നാൽ സന്തോഷം ശാശ്വതമായ ഒന്നല്ലെന്നും അദ്ദേഹം പറയുന്നു.

അങ്ങനെയെങ്കിൽ സന്തോഷം എങ്ങനെ അനുഭവിക്കും... അതിന് ലഹരിപോലെ കുറുക്കുവഴികളുണ്ടോ? ഇവയൊന്നും എക്കാലവും നമ്മളെ ആനന്ദിപ്പിക്കില്ലെന്നു അറിയാമെങ്കിലും ആളുകളേറെയും ഈ എളുപ്പവഴികൾ തേടുന്നവരാണ്. എന്നാൽ, ജീവിതത്തിൽ സന്തോഷം നിറയ്ക്കുന്ന വ്യത്യസ്തമായ ശൈലികൾ പരിശീലിക്കുന്നവരും നമുക്കിടയിലുണ്ട്. അവർ പിൻതുടരുന്നത് വിഷാദ ചിന്തകളെ ഒഴിവാക്കിയുള്ള ജീവിതമോ നല്ല സുഹൃത്തുക്കളെ കണ്ടെത്തലോ നല്ല ഭക്ഷണമോ യാത്രകളോ വായനയോ എന്തുമാവാം. അത്തരം ജീവിതശൈലികളിലേക്കുള്ള യാത്ര ഒട്ടും എളുപ്പമല്ല.

അഞ്ച് കാര്യങ്ങൾ

 1938-ൽ ഹാവഡ് സർവകലാശാല രസകരമായൊരു പഠനം നടത്തി. അവിടെ ബിരുദവിദ്യാർഥികളായി വരുന്ന എല്ലാവരുടെയും ജീവിതാനുഭവങ്ങൾ വിലയിരുത്തി. പഠനം കഴിഞ്ഞ് പുറത്തിറങ്ങി മരണം വരെയുള്ള അവരുടെ ജീവിതത്തെ നിരന്തരമായി നിരീക്ഷിച്ചുകൊണ്ടുള്ള ഒരു പഠനമാണ് നടത്തിയത്. 84 വർഷം നീണ്ട, 30,000-ത്തിലധികം വിദ്യാർഥികളുടെ ജീവിതത്തിലൂടെ കടന്നുപോയൊരു പഠനം. ആയുർദൈർഘ്യം കൂട്ടുന്ന അഞ്ച് കാര്യങ്ങളാണ് കണ്ടെത്തിയത്.

ചിട്ടയായ വ്യായാമം
ആരോഗ്യകരമായ ഭക്ഷണശീലം 
പുകവലിയും പുകയില ഉത്പന്നങ്ങളും ഉപേക്ഷിക്കുക
അമിതമായ ലഹരി ഉപയോഗം ഒഴിവാക്കുക.
ബന്ധങ്ങളുടെ ഗുണനിലവാരം