യാത്രകളിലേക്ക് ഒരു ലോങ് കിക്ക്

പലതവണ മാറ്റിവെച്ച യാത്രയ്ക്ക് പ്രതീക്ഷിക്കാത്ത നേരത്തൊരു കിക്കോഫ്. ഫുട്ബോൾ താരം സി.കെ.വിനീതിന്റെ യാത്രകൾ അത്തരത്തിലുള്ളതായിരുന്നു. കാടുകളിലൂടെ, ഗ്രാമങ്ങളിലൂടെ, മനുഷ്യരെ കണ്ടും അറിഞ്ഞുമുള്ള ഇന്ത്യൻ യാത്ര ആരംഭിക്കുന്നു

- CK VINEETH

ജീവിതത്തിൽ ഞാൻ ഏറ്റവും ആസ്വദിച്ചു ചെയ്യുന്ന രണ്ട് കാര്യങ്ങളാണ് ഫുട്ബോൾ കളിയും യാത്രകളും. തന്ത്രങ്ങൾ മെനഞ്ഞ് മനസ്സും ശരീരവും അർപ്പിച്ച് കളിച്ചാലും ഫുട്ബോൾ ഗ്രൗണ്ടിൽ ആഗ്രഹിച്ച റിസൽറ്റ് കിട്ടണമെന്നില്ല. ചിലപ്പോൾ ചടുലമായ നീക്കങ്ങളും വേഗവുമുള്ള കളികളായിരിക്കും ജയം നൽകുന്നത്. യാത്രകളും അതുപോലെയാണ്. ഒരു ലക്ഷ്യവുമില്ലാതെ പുറപ്പെടുന്ന യാത്രകളാവും ആവേശകരവും മധുരവുമുള്ള ഓർമകൾ സമ്മാനിക്കുന്നത്. അത്തരം യാത്രകൾ ഇഷ്ടപ്പെടുന്ന ഒരാളാണ് ഞാൻ.

2020 ഡിസംബർ 22. ഇന്ത്യൻ സൂപ്പർ ലീഗ് മത്സരങ്ങൾ ഗോവയിൽ തുടങ്ങിക്കഴിഞ്ഞു. ഈസ്റ്റ് ബംഗാളിന് വേണ്ടിയാണ് ഞാൻ കളിക്കുന്നത്. രണ്ട് മത്സരം കഴിഞ്ഞു. അപ്രതീക്ഷിതമായി ടീമിൽനിന്ന് പുറത്തുപോകേണ്ട അവസ്ഥയുണ്ടായി. പിന്നെ അവിടെ നിൽക്കാൻ തോന്നിയില്ല. അന്ന് രാത്രി തന്നെ മടങ്ങാൻ തീരുമാനിച്ചു. എന്റെ ജീപ്പെടുത്താണ് ഗോവയിലേക്ക് പോയിരുന്നത്. അതുകൊണ്ടുതന്നെ മടക്കയാത പ്രത്യേകിച്ച് ഒരുക്കങ്ങളുടെ ആവശ്യമുണ്ടായിരുന്നില്ല.

പുലർച്ചെ നാലുമണിയോടെ കണ്ണൂരിലേക്ക് തിരിച്ചു. പ്രതീക്ഷിക്കാത്ത മടക്കമായതിനാൽ മനസ്സ് ശൂന്യമായിരുന്നു. ഇനിയെന്താണ് ചെയ്യേണ്ടത്? വണ്ടിയോടിച്ച് ഒറ്റയ്ക്കുള്ള ആ യാത്ര പക്ഷേ, ആശ്വാസം തന്നു. അപ്പോഴാണ് ഏറെക്കാലമായി മനസ്സിൽ കൊണ്ടുനടന്നിരുന്ന വലിയ ഒരാഗ്രഹത്തെക്കുറിച്ച് ഓർത്തത്. ഇന്ത്യ മുഴുവൻ ചുറ്റിക്കാണണം. കാടുകളും ഗ്രാമങ്ങളും നഗരങ്ങ ളും എന്നില്ലാതെ ഓരോ ഇടവും കണ്ടറിയണം. അതിനായി ദീർഘയാത്രയ്ക്കുള്ള എല്ലാ സജ്ജീകരണങ്ങളോടും കൂടി ബുള്ളറ്റ് പക്ഷേ, തയ്യാറാക്കിവെച്ചിരുന്നു. സമയം ലഭിച്ചിരുന്നില്ല. നീണ്ടു പോയ ആ യാത്ര ഇപ്പോഴായാലോ എന്ന ചിന്ത ശക്തമായി. ഒറ്റയ്ക്കുള്ള യാത്രകൾ എപ്പോഴും ഹരമാണ്. പക്ഷേ, മിക്കപ്പോഴും അത് സാധിക്കാറില്ല. ഭൂരിഭാഗം യാത്രകളിലും കൂട്ടുകാർ ആരെങ്കിലും കൂടെയുണ്ടാകും.