പരാശർ ഹിമശൃംഗത്തിലെ നീലത്തടാകത്തിനരികെ

ഹിമാലയതാഴ്വരകളുടെ അനിർവചനീയസൗന്ദര്യത്തിനൊപ്പം പുരാണേതിഹാസകഥകളും കൂട്ടുചേരുന്ന വഴികൾ... നീലത്തടാകമായ പരാശറിലേക്ക് നീളുന്ന യാത്ര

- K R AJAYAN

മുന്നിൽക്കണ്ട കുന്നിൽ, ഭീമസേനൻ ഇടംകൈമുട്ടു കൊണ്ട് ഒരു തട്ട് കൊടുത്തു. അതിന്റെ ആഘാതത്തിൽ തലയോട്ടി പൊട്ടി മാറുമ്പോലെ, കുന്നിന്റെ മുകൾഭാഗം തവിടുപൊടിയായി. മധ്യഭാഗം കുഴിഞ്ഞ്, പെട്ടെന്ന് അവിടെ ഒരു തടാകം രൂപപ്പെട്ടു. ഭീമസേനന്റെ തോളിൽ അടക്കം പൂണ്ടിരുന്ന ബാർബാറികൻ, മുത്തച്ഛന്റെ ചെവിയിൽ പറഞ്ഞു: “ഞാനിനി ഇവിടം വിട്ട് വരുന്നില്ല. എനിക്കേറെ ഇഷ്ടമായി. ആജീവനാന്തം എന്റെ താമസം ഇനി ഇവിടെ...

കുരുക്ഷേത്രയുദ്ധാനന്തരം എല്ലാ പാപങ്ങളുമിറക്കിവെച്ച് മുക്തിമാർഗത്തിലാണ് പാണ്ഡവർ. ഭീമസേനന് ഹിഡിംബിയിൽ പിറന്ന മകൻ ഘടോൽക്കചൻ, സ്വപിതാവിന്റെ കുലം രക്ഷിക്കാനുള്ള പോരാട്ടത്തിൽ, കർണൻ കരുതി വെച്ച വേലിനാലില്ലാതായി. ഘടോൽക്കചന്റെ മകൻ കാംരുങ്ങിനെ (ബാർബാറികൻ) ഭീമൻ തോളിലേറ്റി. അന്ന് മഴ തിമർത്തു പെയ്തുവത്രേ. ഭീമൻ കുഞ്ഞിനെ നോക്കി. അവന്റെ ശരീരമാണ് ചെയ്യുന്നത്. അതിൽ നനഞ്ഞുകുതിർന്ന ഭീമൻ, കുഞ്ഞുമകനോട് പറഞ്ഞു: “നീയിനി മഴയുടെ അധിപൻ. ജലത്തിന്റെ ദൈവം യക്ഷവംശജനായതി നാൽ, ഒപ്പമുള്ളവർ കുട്ടിക്ക് ഒരു വിളിപ്പേരുകൂടി നൽകി “രാതൻ യക്ഷ്

ആഴമളക്കാൻ കഴിയാത്ത തടാകത്തിന് മുന്നിൽ കാംരുങ് നിന്നു. ചുറ്റും കൂടിയവർ, ആടയാഭരണങ്ങളെല്ലാം അവ ന് മുൻപിൽ കൂമ്പാരം കൂട്ടി. അവർ പ്രഖ്യാപിച്ചു. “ഇനി നീയാണ് ഞങ്ങളുടെ ദൈവം. നിനക്ക് തോന്നുമ്പോൾ, ചെയ്യുക. അല്ലാത്തപ്പോൾ, ഇവിടെ തളംകെട്ടിക്കിടക്കുക. 

പരാശർ തടാകത്തിന് മുന്നിൽ നിൽക്കുമ്പോൾ, ഈ ഐതിഹ്യകഥകളെല്ലാം മനസ്സിലൂടെ കടന്നുപോയി. ഞാനും മനസ്സിൽ പ്രാർഥിച്ചു; ഇവിടെ തളംകെട്ടിക്കിടക്കുക. എന്നെപ്പോലെ മുന്നിലെത്തുന്നവർക്ക് ഇനിയും കാണാനായി... സ്വപ്നങ്ങൾ ഇറക്കിവയ്ക്കാനുള്ള ഒരു നീലത്തടാകമായി...

ഒരു പകൽ മുഴുവനലഞ്ഞാണ് പരാശർ തടാകത്തിന് മുന്നിലെത്തിയത്. ഹിമാചലിലെ പാർവതിവാലിയുടെ കയറ്റിറക്കങ്ങളിൽ ഒരാഴ്ചയോളം ചെലവിട്ടശേഷം കൽഗാ ഗ്രാമത്തിൽനിന്ന് പുലർച്ചെ വാഹനമേറുമ്പോൾ, ഇരുട്ട് വീഴുംവരെയുള്ള യാത്രയായിരിക്കുമിതെന്ന് അറിഞ്ഞിരുന്നില്ല.