ജനുവരി പിറന്ന റോമിലൂടെ

നാല് ഋതുക്കളെയും പുൽകി ലോകം മറ്റൊരു നവവത്സരത്തിലേക്ക് കടക്കുന്നു. ആഘോഷങ്ങളും മിത്തുകളും നിറഞ്ഞ, റോമിന്റെ മണ്ണിലൂടെ ഒരു പുതുവത്സരയാത്ര

- JOLLY AUGUSTINE CHITTARACKAL

പുതുവർഷപ്പിറവി! ഒരു മനസ്സോടെ ലോകം ആഹ്ലാദിക്കുന്ന ഈ ദിനം ഉത്സവമാക്കാൻ, നവസ്വപ്നങ്ങളും പ്രതീക്ഷകളുമായി ഇന്നും യാത്രാപ്രേമികൾ കാതങ്ങൾ താണ്ടി, യൂറോപ്പ് തേടിയെത്തുന്നു. കടുത്ത തണുപ്പും കൊഴിയുന്ന ശിശിരമഞ്ഞും പകരുന്ന അനുഭൂതിയിൽ ഇല കൊഴിഞ്ഞ വിശാലമായ വീഥികളിലൂടെ യവനശില്പങ്ങൾ സാക്ഷിയായി നിരന്നുനീങ്ങുന്നവർ. ക്രിസ്മസിന്റെ പൊലിമ മാഞ്ഞിട്ടില്ല ഇപ്പോഴും. കണ്ണഞ്ചിപ്പിക്കുന്ന നിറങ്ങളും അലങ്കാരങ്ങളുമായി തെരുവുകളും പാതയോരങ്ങളും വർഷാരംഭ രാത്രിയും കാത്ത് ഉണർന്നിരിക്കുന്നു. വിരുന്ന് സൽക്കാരങ്ങളിൽ നുരഞ്ഞുപൊന്തുന്ന വീഞ്ഞിനൊപ്പം പുലരും വരെ തമാശകളും ആർത്തലയ്ക്കുന്ന പൊട്ടിച്ചിരികളും. അർധരാത്രിയിൽ വാനംമുട്ടെ ആശംസാ മാറ്റൊലികൾ. വർഷാവസാന അത്താഴത്തോടെ തുടങ്ങുന്ന ആഘോഷങ്ങൾ പുതുവർഷ പുലരി വരെ നീളുന്നു. പടക്കവും സംഗീതവും നൃത്തവുമായി ഷാംപെയിൻ ഒഴുകുന്ന ജനുവരി ഒന്നിന് പിന്നിൽ പുരാതന റോമൻ സംസ്കാരത്തിന്റെ നിഴൽപ്പാടുകൾ കാണാം. ആരെയും ആകർഷിക്കുന്ന ഒരുപിടി ആചാരങ്ങൾ

 ജനുവരിയുടെ പിറവി

പുരാതന റോമിന്റെ ആരാധ്യദേവൻ ജാനസിന്റെ (Janus) പേരിൽ നിന്നുമാണ് ജനുവരിയുടെ (lanuari ജനനം. റോമിന്റെ രണ്ടാമത്തെ രാജാവായ നമ പോംപീലിയോയുടെ (Numa Pompilio) കാലത്ത് കടന്നു പോകൽ പ്രതീകമാക്കുന്ന, പിന്നിലേക്കും മുന്നിലേക്കും ദ്വിമുഖമുള്ള ജാനസ് ദേവന്റെ ദിനം തിരഞ്ഞെടുത്തു. പടിയിറങ്ങുന്ന വർഷത്തോടുള്ള കൃതജ്ഞതയുടെയും പുതുവർഷത്തോടുള്ള ആദരവിന്റെയും സൂചകമായിരുന്നു ഇത്. B.C 191-ൽ പോന്തിഫെക്സ് മാക്സി മ്യൂസ് (അക്കാലത്ത് നിയമം നിർമിക്കാനും നടപ്പാക്കാനും അധികാരമുള്ള ആൾ) ആയിരുന്ന പുബ്ലിയൂസ് ലിച്ചീനിയുസ് കാസ്സുസ് ദീവെസ് ആണ് ജനുവരി ഒന്ന് പുതുവത്സരാഘോഷങ്ങൾക്കായി തിരഞ്ഞെടുത്തത്. അന്നുവരെ റോമിന്റെ കുലദൈവമായ ചൊവ്വയുടെ മാസമായ മാർച്ച് 1 ആയിരുന്നു പുതുവത്സര പിറവി.