റോമൻ റോഡിലെ സത്രങ്ങൾ

പഴയ ഇംഗ്ലണ്ടിന്റെ ഓർമ്മകൾ കുടിയൊഴിഞ്ഞു പോകാത്ത ബ്രെന്റ്വുഡ്. ഇന്നത് ഒട്ടേറെ മലയാളികളുടെ തട്ടകമാണ്

- ASWATHY M. S

ഇംഗ്ലണ്ടിന് കിഴക്ക്, ലണ്ടനിൽ നിന്ന് ഏതാണ്ട് 30 മൈൽ ദൂരെയുള്ള ചെറു പട്ടണമാണ് ബ്രെന്റ് വുഡ്. വലിയ ആരവങ്ങളോ ബഹളങ്ങളോ ഒന്നും ഇല്ലാത്ത ഒരിടം! പ്രധാന റോഡായ "ഹൈ സ്ട്രീറ്റ്' ഒഴിച്ചാൽ കമേഴ്സ്യൽ ബിൽഡിങ്ങുകൾ വളരെ കുറവാണ്. കൂടുതലും വീടുകളും അപ്പാർട്മെന്റുകളും ആണ് ഇവിടെയുള്ളത്. അതിൽ പലതിനും പറയാൻ ഒരുപാട് കഥകളുണ്ടെന്ന് തോന്നും!. കാലങ്ങളുടെ തണുത്തുറഞ്ഞ കഥകൾ. പഴയ ബ്രിട്ടന്റെ ആദ്യ തലസ്ഥാനവും, ബ്രിട്ടനിലെ തന്നെ ഏറ്റവും പുരാതനമായ നഗരം എന്ന് അറിയപ്പെടുന്നതുമായ കോൾ ചെസ്റ്റർ' നഗരത്തിന്, തന്റെ റോമൻ കഥകളും പഴമയും പറയുമ്പോൾ അതിൽ ബ്രന്റ് വുഡിനെ മാറ്റി നിർത്താൻ ആവില്ല. കോൾ ചെസ്റ്ററിൽ നിന്നും ലണ്ടനിലേക്ക് ഉണ്ടായിരുന്ന റോമൻ റോഡിൽ, തീർത്ഥാടകർക്കുള്ള ഇടത്താവളമായിരുന്ന ഇടമാണ് പിന്നീട് ബ്രെന്റ് വുഡ് എന്ന പട്ടണമായി വളർന്നത്. കൊടുംകാടായിരുന്നു അവിടമെന്നും, അവിടെ ഉണ്ടായ ഒരു വലിയ തീപിടുത്തത്തിൽ കുറെയൊക്കെ നശിച്ചെന്നും, അങ്ങനെ "Burnt Wood'എന്നതിൽ നിന്നാണ് പിന്നീട് ആ സ്ഥലത്തിന് "Brentwood' എന്ന പേര് ഉണ്ടായതെന്നും പറയപ്പെടുന്നു.