అపూర్వ శిష్యుడు అలౌకిక గురువు

భారతదేశం సనాతన వైభవాన్ని కోల్పోయి పరాయిపాలనలో నిస్సహాయంగా ఆక్రందిస్తున్న కాలమది.

- - శ్రీమతి గంగవరం శ్రీదేవి

భారతదేశం సనాతన వైభవాన్ని కోల్పోయి పరాయిపాలనలో నిస్సహాయంగా ఆక్రందిస్తున్న కాలమది. ఢిల్లీలో మొఘలులు, బీజాపూర్ సుల్తానులు అతికిరాతకంగా ప్రజలను హింసిస్తున్న రోజులలో ఒక స్వతంత్ర హైందవ మహా సామ్రాజ్యం దేదీప్యమానంగా రూపుదిద్దుకొంది. దానిని సాధించిన చారిత్రక దివ్యపురుషులు సమర్థ రామదాసు, ఛత్రపతి శివాజీలు!

అగ్రతః చతురో వేదాః పృష్ఠతః సశరం ధనుః ।

ఇదం బ్రాహ్మం ఇదం క్షాత్రం శాపాదపి శరాదపి |

అని ఉదోషిస్తూ వీరిని కీర్తిస్తారు. క్రీ.శ. 1674లో ఛత్రపతి శివాజీ మహారాజుకు పట్టాభిషేకం జరిగింది. స్వధర్మ స్వరాజ్య, స్వాభిమానాలతో, దేశభక్తి ప్రజ్వరిల్లేలా అవతరించి అప్రతిహతంగా నిలిచింది మహా హైందవ సామ్రాజ్యం! దీని వెనుక ఉన్నది అమోఘ వ్రత సంకల్పుడు, అలౌకిక ప్రజ్ఞాధురంధరుడు, నిస్సంగుడు అయిన మహా గురువు సమర్థ రామదాసు!

జమదగ్ని మహర్షి వంశపరంపరలోని వాడైన సూర్యాజీపంత్ 3 సంవత్సరాలపాటు సూర్యోపాసన చేస్తూ, రామచంద్రమూర్తి కోసం తపస్సు చేశాడు. 1608వ సంవత్సరం చైత్ర శుద్ధ నవమి నాడు సీతాలక్ష్మణ హనుమత్సమేతుడైన శ్రీరామచంద్రమూర్తి దర్శనమిచ్చాడు. అదేరోజు ఆయన ధర్మపత్ని రాణూబాయిలో అలౌకిక తేజస్సు ప్రవేశించింది. అలా ప్రభవించిన మహిమాన్విత దివ్యబాలుడికి 'నారాయణుడు' అని నామకరణం చేసినా, నారోబా అని ముద్దుగా పిలిచేవారు. రాణూబాయి నా రోబాకు పసివయసు నుంచే నామదేవ్, ఏకనాథ్ వంటి మహాభక్తుల అభంగాలను నేర్పించేది. యుక్తవయస్సు వచ్చాక తల్లి కోరిక మేరకు వివాహానికి సన్నద్ధుడయ్యాడు. కానీ వివాహ దుస్తులతోనే గోదావరి నదిలో దూకి జలస్తంభన విద్యతో ధ్యానంలో లయించిపోయాడు. కుటుంబ సభ్యులు ఆతడి మనఃస్థితిని అర్థం చేసుకుని ఆవేదనతోనే అతనిని వదిలివెళ్ళారు.