విడువరా దెంతైనా...

ఎందరు మనల్ని పట్టుకున్నా, పట్టుకోవాల్సిన వారు పట్టుకోకపోతే మనం పట్టుతప్పిపోతాం

- శ్రీ శ్రీమతి బి. కృష్ణకుమారి

అన్నమయ్య పదామృతం 

విడువరా దెంతైనా వెట్టివాడనైన నీకు కడవారు నవ్వకుండా గాచుకో నన్నును ॥

 జ్ఞానము నే నెఱగ నజ్ఞానము నే నెఱగను మానను విషయములు మరిగెంతైనా నీ నామము నొడిగి నీ దాసుడ ననుకొందు దీనికే వహించుకొని తిద్దుకో నన్నును ॥

అకర్మము నెఱగను సుకర్మము నెఱగను ప్రకట సంసారముపై పాటు మానను వొకపనివాడనై పూని ముద్రధారినై తి మొకమోడి యిందుకే గోమున నేలు నన్నును II

 వెనక గానను ముందు విచారించి కానను నినుపై దేహధారినై నీకు మొక్కేను ఘనుడ శ్రీ వేంకటేశ కన్నులెదుట బడితి కని పోవిడువరాదు కరుణించు నన్నును II

ఎందరు మనల్ని పట్టుకున్నా, పట్టుకోవాల్సిన వారు పట్టుకోకపోతే మనం పట్టుతప్పిపోతాం.ఎందరు ఆదరించినా, అనాథలమవుతాం.ఆదరించాల్సినవారు ఆదరించకపోతే అన్యులు ఎందరు రక్షణగా ఉన్నా, అసలైన రక్షకుల రక్షణ లేకపోతే ఆపదల పాలవుతాం. అందుకే పట్టువిడవకుండా ఆ అసలైన వాడిని పట్టుకోవాలి. మనల్ని పట్టుసడలకుండా పట్టుకొమ్మని ఆయననూ ప్రాధేయపడాలి.