'ప్రజల మనిషి' ఆళ్వారుస్వామి

శతాబ్దాల తరబడి రాజ్యాధిపత్య, దొరల భూస్వామ్య దోపిడీ వ్యవస్థ కబంధ హస్తాలలో, తెలంగాణ సీమ నైజాం హైదరాబాద్ స్టేట్గా, తీవ్ర అణచివేత, హింసా దౌర్జన్య దుస్థితి ఎదుర్కొంది.

- జయసూర్య

శతాబ్దాల తరబడి రాజ్యాధిపత్య, దొరల భూస్వామ్య దోపిడీ వ్యవస్థ కబంధ హస్తాలలో, తెలంగాణ సీమ నైజాం హైదరాబాద్ స్టేట్గా, తీవ్ర అణచివేత, హింసా దౌర్జన్య దుస్థితి ఎదుర్కొంది. వట్టికోట ఆళ్వార్స్వామి పుట్టి పెరిగిన కాలం, జీవించిన సంధికాలంలో తెలంగాణ సమాజం అమానుష, సనాతన భూస్వామ్య వ్యవస్థపై సంఘర్షణలు ప్రారంభమై పోరాటాలు తల ఎత్తాయి.

తెలంగాణ గ్రామీణ సమాజంలో చైతన్యం రగిలించే లక్ష్యంతో ఆళ్వార్స్వామి, మధ్య తరగతి గ్రామీణ రైతాంగాన్ని సామాజిక, రాజకీయ పోరాట దిశలో మలుపు తిప్పిన తెలంగాణ వైతాళికులలో ఒకరుగా తన జీవిత కాలం సాహిత్యం ఆయుధంగా, తొలుత ప్రజాస్వామిక ఉద్యమాలకు, క్రమేపీ కమ్యూనిస్ట్ సాయుధ పోరాటానికి చేయూత అందించారు.