தமிழ் மக்களுக்குக் கிடைத்துள்ள அதிகாரங்களை கையிலெடுத்தாலே வட -கிழக்கை பாதுகாக்க முடியும்

கடந்த அரசாங்கங்களைப் போலவே தற்போதைய தேசிய மக்கள் சக்தி அரசாங்கமும் தமிழ் மக்களுடன் அதிகாரங்களைப் பகிர்ந்து கொள்ள விருப்பமற்றதாகவே இருக்கின்ற சூழலில் நாம் எமது நீண்ட போராட்டத்தின் விளைவாக எமக்குக் கிடைத்த மாகாணசபையைக் கையகப்படுத்தி அதன் அதிகாரங்கள் போதாது என்பதை சகலருக்கும் தெரிவித்து எமது இலக்கை நோக்கி நகர்வதே புத்திசாதுர்யமான செயற்பாடாகுமென ஈழ மக்கள் புரட்சிகர விடுதலை முன்னணியின் தலைவர் சுரேஷ். க. பிரேமச்சந்திரன் தெரிவித்துள்ளார்.

- 

இது தொடர்பில் அவர் வெளியிட்டுள்ள அறிக்கையில் மேலும் தெரிவித்துள்ளதாவது,

தற்போது ஆட்சியில் இருக்கும் அரசு பல்வேறுபட்ட உறுதிமொழிகளை வழங்கி ஆட்சி அதிகாரத்திற்கு வந்தது. அதில் மாகாணசபைத் தேர்தல்கள் நடத்தப்படும், புதிய அரசியல் சாசனம் உருவாக்கப்படும், பயங்கரவாத தடைச் சட்டம் நீக்கப்படும் என்பது தமிழ் மக்களைப் பொறுத்தவரையில் முக்கியமான உறுதிமொழிகள். ஜனாதிபதித் தேர்தலுக்குப் பின்னர் ஏறத்தாழ 10 மாதங்கள் கடந்துவிட்ட நிலையிலும் இந்த உறுதிமொழிகள் எதுவும் நடைமுறைப்படுத்துவதற்கான ஆரம்பகட்ட முயற்சிகளோ நடவடிக்கைகளோ மேற்கொள்ளப்படவில்லை. ஆனால் நாங்கள் மாகாணசபைத் தேர்தல்களை நடத்துவோம், புதிய யாப்பைக் கொண்டுவருவோம், பயங்கரவாத தடைச் சட்டத்தை நீக்குவோம் என்று தொடர்ச்சியாகக் கூறி வருகின்றனர்.

தற்போது முதல்முறையாக எல்லை நிர்ணய பிரச்சினைக்குத் தீர்வு கண்டபின்னரே மாகாணசபைத் தேர்தல்களை நடத்த முடியுமென்று மாகாணசபைகள் அமைச்சர் சந்தன அபேரத்தன தெரிவித்திருக்கின்றார். ஏற்கனவே அமைக்கப்பட்ட ஆணைக்குழுவினால் எல்லை மீள்நிர்ணயம் செய்த போதும் கூட அது மலையகத் தமிழ் மக்களினதும் இஸ்லாமிய மக்களினதும் பிரதிநிதித்துவத்தைக் கணிசமான அளவில் குறைக்கின்றது என்ற அடிப்படையில் எல்லை நிர்ணய சபையினால் ஏற்கனவே மேற்கொள்ளப்பட்ட எல்லை நிர்ணய முடிவுகள் கைவிடப்பட்டன.