இரண்டாவது சர்வதேச கல்வியியல் ஆய்வு மாநாடு - 2025

இரண்டாவது சர்வதேச கல்வியியல் ஆய்வு மாநாடு, யாழ்ப்பாண பல்கலைக்கழகத்தில் கடந்த ஜூன் மாதம் 14,15ஆம் திகதிகளில் இடம்பெற்றது.

- 

உயர் பட்டப்படிப்புக்கள் பீடமும், யாழ்ப்பாண பல்கலைக்கழக கலைப்பீடத்தின் கல்வியியல் துறையும் இணைந்து இந்த ஆய்வு மாநாட்டை ஒழுங்கமைத்திருந்தன.

"நிலைபேண்தகு கல்விக்கான புதுமையான நடைமுறைகளை வெளிப்படுத்துதல்: சவால்கள் மற்றும் வாய்ப்புகள்” என்ற தொனிப்பொருளை அடிப்படைக் கருவாக இந்த மாநாடானது கொண்டிருந்தது.

இந்த ஆய்வு மாநாட்டுக்கென பல்வேறு துறைசார் ஆய்வாளர்களினால் சுமார் 200 ஆய்வுக் கட்டுரைகள் சமர்ப்பிக்கப்பட்டன. அவற்றுள் 140 கட்டுரைகள் தெரிவு செய்யப்பட்டன. தெரிவுசெய்யப்பட்ட ஆய்வு கட்டுரைகளைத் தேசிய கல்வி நிறுவகம், பேராதனை, கொழும்பு, மொறட்டுவ மற்றும் யாழ்ப்பாணம் ஆகிய பல்கலைக்கழகங்களைச் சேர்ந்த மாணவர்கள், உயர் பட்டப்படிப்பு மாணவர்கள் மற்றும் விரிவுரையாளர்கள் சமர்ப்பித்திருந்தனர்.

அத்துடன், இந்தியப் பல்கலைக்கழகங்களின் முனைவர் பட்ட ஆய்வு மாணவர்களாலும் ஆய்வு கட்டுரைகள் சமர்ப்பிக்கப்பட்டமை முக்கியமான அம்சமாகும்.

இந்த மாநாட்டின் இரண்டு தினங்களும் காலை அமர்வுகள் யாழ்ப்பாண பல்கலைக் கழகத்தின் கைலாசபதி அரங்கிலும் மாலை அமர்வுகள் உயர் பட்டபடிப்பு பீடத்திலும் நடைபெற்றன. காலை அமர்வுகள் சம்பிரதாய விடயங்கள், திறவுகோல் உரைகள் மற்றும் புலமைத்துவ கலந்துரையாடல்களை உள்ளடக்கியிருந்தன. மாலை அமர்வுகளில் ஆய்வாளர்களால் ஆய்வுகள் முன்வைப்புச் செய்யப்பட்டன. எட்டு ஆய்வு மையங்களில் பல்வேறு ஆய்வுத் தடங்களை உள்ளடக்கியதாக இம் முன்வைப்புக்கள் அமைந்திருந்தன.

முதலாம் நாள் நிகழ்வுகள் பல்கலைக்கழக துணைவேந்தர் பேராசிரியர் சி.சிறிசற்குணராசா முன்னிலையில் உயர் பட்டப்படிப்புகள் பீட பீடாதிபதி சிரேஷ்ட பேராசிரியர் தி.வேல்நம்பி மற்றும் கலைப்பீட பீடாதிபதி பேராசிரியர்.சி.ரகுராம் இணைந்து தலைமை வகிக்க நடைபெற்றது.