Gemengde uitslae in 7's

Die jaarlikse OK-Mamre-gemeenskap-7's-toernooi is verlede Saterdag (29 November) in Mamre beslis.

- David Rossouw

Die toernooi, wat vier jaar gelede ontstaan het, het tot 'n merkwaardige toernooi gegroei en word as een van die bes-georganiseerde 7's-toernooie in die Wes-Kaap beskou.

Die groepwedstryde het net ná 09:00 afgeskop en dit was uit die staanspoor duidelik dat die spanne honger is vir 7's-rugby in die koeler weersomstandighede vroeg die oggend.

Wesbank, van Malmesbury, het ook aan die byeenkoms deelgeneem en in sy groepwedstryde gewys hy is reg toe hy Darling B met 33-0 afgeransel het. In die Sweet 16-afdeling het Wesbank die span van Caledon 21-12 verslaan en na die beker-kwarteindstryd teen Hamlets B, een van die gunstelinge en die gasheer span, deurgedring.

Wesbank het die tuisspan in 'n opwindende wedstryd harde bene laat kou en op kritieke oomblikke die bal laat val, wat Hamlets B benoud gehad wanneer hulle aangeval het. Ongelukkig moes hulle die knie buig toe hulle met 21-5 verloor het en huiswaarts moes keer. Die jong span is gewis op die regte pad en kan vorentoe net verbeter met meer ondervinding en ontwikkel in 'n goeie 7's-span.