Dominee het nou regsgraad

'n Dominee en boorling van Saron en wat in 2013 daarvan beskuldig is dat hy 'n minderjarige meisie tydens 'n kerk-jeugkamp seksueel mishandel het, is nie net vrygespreek van die bewerings en strafregtelike aanklagte nie, maar spog nou ook met 'n regsgraad wat hy verlede maand aan die Universiteit van Suid-Afrika (Unisa) verwerf het.

- Rasaad Adams

Die Paarl-streekhof het ds. Frederick du Toit van die VGK-gemeente in Ashton in September verlede jaar op aanklagte van statutêre verkragting onskuldig bevind.

Hy was in daardie stadium reeds besig om aan sy regsgraad te werk en vertel die plan was sodra hy sy onskuld bewys het, hy sy regsposisie sou gebruik om diegene wat ook onregmatig vervolg word, by te staan.

Du Toit is in 2009 as leier van die VGK in Ashton ingeseën.

Die bewerings was dat hy in 2010 tydens 'n jeugkamp in Bainskloof buite Wellington glo 'n minderjarige meisie, wat deel van 'n jeugprogram by die kerk was, seksueel mishandel het.

Hy is eers vroeg in 2013 aangekla.

Die saak is aanvanklik in die Wellington-landdroshof aangehoor, maar is toe na die streekhof in die Paarl oorgeplaas.