Nog bek-en-klouseer gekry

Die nuutste verwikkeling rakende die bek-en-klouseer-uitbreking op die geïndekseerde plaas in Gouda dui op nóg beeste gevind wat nie teen die hoogs aansteeklike virussiekte ingeënt is nie. Dít het 'n regstreekse invloed op die kwarantynperiode, kliniese inspeksies en die verdere hantering van die uitbreking.

- 

Só sê Agri Wes-Kaap (AWK) en die Rooivleis Produsente-organisasie, Wes-Kaap (RPOWK), in hul jongste persverklaring hieroor.

Nóg diere is op 25 November op die indeksplaas ingeënt, wat dus die nuwe datum van waar die twee weke kliniese waarnemingsperiode getel sal word en die kwarentyntydperk met 'n verdere 28 dae sal verleng.

Verdere ondersoek toon egter steeds daar was geen verdere verspreiding van die siekte vanaf die indeksplaas nie.

"Alle inspeksies en ondersoeke toon dat die uitbreking steeds tot slegs die indeksplaas beperk is. Hoewel die dag-0-datum aangeskuif het, is dit bemoedigend dat die beheermaatreëls doeltreffend is om die uitbreking te beperk," verduidelik die organisasies.