Stilbaai-aktiwiteitsekspo

STILBAAI - Die Gemeenskapsaal was onlangs 'n miernes van bedrywighede toe 'n klompie uitstallers gewys het waarmee jy jou kan besig hou in en om Stilbaai.

- Johan Victor

Sommer met die intrapslag was Jagersbosch-gemeenskapsorg daar met warm koffie, terwyl Ina Briel en Gail Collins gereed gestaan het om jou bloeddruk te meet.

Leeskring

Die leeskring kom elke tweede Donderdag van die maand om 14:00 by die biblioteek bymekaar waar hulle spesifieke boeke bespreek en soms is die skrywer ook teenwoordig om te praat oor sy of haar boek. Besoek hulle gerus om meer uit te vind.

Skryfkring

Die Stilbaai-skryfkring vergader elke laaste Donderdag van die maand en dan bespreek hulle stukkies wat hulle die afgelope maand geskryf het. Dit is spesifieke temas waarop besluit is. So leer hulle dan bymekaar en verbeter hulle skryfkuns. Alle aspirantskrywers en ook gevestigde skrywers word aangemoedig om deel te word van die skryfkring. Kontak Esther Scheffer by 082 460 6338 vir meer inligting.

Vroue-landbouvereniging

Diegene wat dink dat die VLV net 'n klomp tannies is wat koekies bak en brei of hekel moet weer dink. Daar is kuns en handvlyt, leefstyl en gesondheid om maar net 'n paar te noem en met elke vergadering word kenners op hulle gebied genooi om praatjies en demonstrasies te lewer. Hulle kom eenmaal 'n maand by Die Waenhuis by Jagersbosch bymekaar. Vir meer inligting kontak Carol Scott by 082 783 4127.