શક્તિપીઠ અંબાજી ખાતે ભાદરવી પૂનમના મહામેળાનું ભવ્યાતિભવ્ય આયોજન કરાયું

અરવલ્લીની ગિરિમાળાઓ બોલ મારી અંબે, જય જય અંબે'ના ગગનભેદી તાદ સાથે ગુંજી ઊઠી

- 

શક્તિ, ભક્તિ અને આસ્થાના કેન્દ્ર એવા આરાસુરી મા અંબાની શક્તિપીઠ અંબાજી ખાતે આગામી ૧થી ૭ સપ્ટેમ્બર દરમિયાન ભાદરવી પૂનમના મહામેળાનું ભવ્યાતિભવ્ય આયોજન કરાયું છે. પદયાત્રીઓને તમામ પ્રકારની સુવિધા મળી રહે તે માટે તમામ વ્યવસ્થા કરવામાં આવી છે. અંબાજીમાં ભાદરવી પૂનમનો મેળો એ ગુજરાતનો સૌથી મોટો મેળો છે, જેમાં લાખો શ્રદ્ધાળુ મા અંબાનાં દર્શન અને માનાં ચરણોમાં શીશ ઝુકાવવા માટે આવે છે. ગુજરાત, રાજસ્થાન સહિત ભારતભરમાંથી લાખો શ્રદ્ધાળુ પદયાત્રી, પગપાળા સંઘ માતાજીના જયજયકાર સાથે અંબાજી પહોંચે છે. અરવલ્લીની ગિરિમાળા અત્યારે બોલ મારી અંબે, જય જય અંબેના નાદ સાથે પદયાત્રીઓથી ગુંજી રહી છે. યાત્રાળુ સરળતાથી અંબાજી પહોંચી શકે તે માટે વાહન વ્યવસ્થાના ભાગ રૂપે રાજ્યના અલગ અલગ સ્થળેથી કુલ ૫,૫૦૦ એસટી બસ ફાળવવામાં આવી છે. આ બસ રાઉન્ડ ટ્રિપ કરશે.