અપહરણકારોની પોલીસને ધમકી: ‘યુવકને નહીં જ છોડીએ, થાય તે ભડાકા કરી લેજો’

ચાંદખેડામાં રહેતા અને શેરબજારનું કામ કરતા યુવકનું ફિલ્મ ઢબે અપહરણ કરાયું: પોલીસના ડરથી આરોપીઓ યુવકને છોડીને નાસી ગયા

- 

અપહરણકારોએ પોલીસને ફોન પર ધમકી આપતાં ચકચાર મચી ગઈ છે. શેરબજારનું કામ કરતા યુવકનું ચાંદખેડામાંથી તેના જ મિત્રો સહિત ત્રણ લોકોએ સફેદ કારમાં અપહરણ કર્યું હતું. યુવકે તેના પરિવારને ફોન કરીને જાણ કરતાં પોલીસની ટીમ ઘટનાસ્થળે આવી પહોંચી હતી. પોલીસે અપહરણકારોને ફોન કર્યો ત્યારે તેમણે જવાબ આપ્યો કે અમે દીપકને નહીં જ છોડીએ, તમારાથી થાય તે ભડાકા કરી લેજો.

ચાંદખેડા વિસ્તારના જગતપુર ખાતે આવેલા કાર્મેલ ફ્લેટમાં રહેતાં જીજ્ઞાબહેન શાહે ચાંદખેડા પોલીસ સ્ટેશનમાં હાર્દિક મકવાણા સહિત ત્રણ લોકો વિરુદ્ધ અપહરણની ફરિયાદ કરી છે. જીજ્ઞાબહેન મૂળ અમદાવાદ જિલ્લાના રાણપુર ગામનાં વતની છે અને છેલ્લા છ મહિનાથી ચાંદખેડામાં પતિ દીપક શાહ સાથે ભાડાના મકાનમાં રહે છે. દીપક શાહ ઘેરબેઠાં ઓનલાઈન શેરબજારનું કામ કરે છે. દીપક શાહ શેરબજારનું કામ છેલ્લાં પાંચ વર્ષથી રાજુલામાં રહેતા હાર્દિક મકવાણા સાથે કરે છે. ધંધાકીય કામના મામલે હાર્દિક અનેક વખત દીપક શાહને મળવા માટે અમદાવાદ આવતા-જતા હોય છે. ગઈ કાલે જીજ્ઞાબહેન અને દીપક શાહ તેમનાં પરિચિત નયનબહેનના ઘરે પર્યુષણ નિમિત્તે જમવા માટે ગયાં હતાં.