જન્માષ્ટમી ફીવરઃ સાતમ-આઠમના તહેવારોના ૧૫ દિવસ પહેલાં જ લાંબા રૂટની ટ્રેનો હાઉસફુલ

૧૫૦થી વધુનું વેઈટિંગ: મનાલી, ગોવા, માઉન્ટ આબુ, નૈનિતાલ, હરિદ્વાર વગેરે સ્થળોએ જવા માટે ધસારો

- 

જન્માષ્ટમીના તહેવાર આડે હવે માત્ર ૧૫ દિવસનો સમયગાળો બાકી રહ્યો છે ત્યારે અમદાવાદ સહિત રાજ્યભરના શ્રદ્ધાળુઓ અને પ્રવાસીઓમાં ભારે ઉત્સાહ જોવા મળી રહ્યો છે, જોકે આ ઉત્સાહ વચ્ચે રેલવે પ્રવાસ એક મોટો પડકાર બની ગયો છે, કારણ કે જન્માષ્ટમીના તહેવારની રજાઓ દરમિયાન લાંબા રૂટની મોટા ભાગની ટ્રેનોમાં જાણે ‘જન્માષ્ટમી ફીવર’ છવાયો હોય તેમ લાંબુ વેઇટિંગ જોવા મળી રહ્યું છે. અમદાવાદથી ઉપડતી અનેક ટ્રેનોમાં તો ૧૫૦થી પણ વધુનું વેઇટિંગ લિસ્ટ પહોંચી ગયું છે, જેના કારણે કન્ફર્મ ટિકિટ મેળવવી મુશ્કેલ બની ગઈ છે. હાલમાં અમદાવાદ, રાજકોટ, જામનગર, ભાવનગર, ગાંધીનગર અને સુરતથી ઉપડતી દહેરાદૂન, મનાલી, ગોવા, શિમલા, માઉન્ટ આબુ જેવાં લોકપ્રિય પ્રવાસન સ્થળોએ જતી ટ્રેનોમાં ૧૫૦થી વધુનું વેઇટિંગ જોવા મળી રહ્યું છે. આ જ સ્થિતિ ધાર્મિક સ્થળોએ જતી ટ્રેનોમાં પણ જોવા મળી રહી છે. નાથદ્વારા, ઋષિકેશ જેવાં ધાર્મિક સ્થળોએ જતી ટ્રેનોમાં પણ સારી એવી ભીડ છે.