આગામી બે દિવસ બાદ ફરી ઉત્તર ભારતમાં વરસાદહિમવર્ષા અને મેદાની વિસ્તારોમાં ઠંડા પવનની ચેતવણી

પૂર્વોત્તર આસામ, અરુણાચલ પ્રદેશમાં છુટોછવાયો વરસાદ, હિમવર્ષાની સાથે તોફાન, વીજળીની સંભાવના

- 

માર્ચ મહિનો શરૂ થતાંની સાથે જ શિયાળાની ઋતુ પૂરી થઈ ગઈ હતી, પરંતુ સક્રિય વેસ્ટર્ન ડિસ્ટર્બન્સના કારણે ઠંડા પહાડી વિસ્તારોમાં વરસાદ અને હિમવર્ષા થઈ રહી છે, જેના કારણે મેદાની રાજ્યોમાં સવારે અને સાંજે ઠંડા પવનોને કારણે વાતાવરણ ઠંડું રહે છે, આગામી બે દિવસ બાદ ફરી ૯ માર્ચે ઉત્તર ભારતમાં આવતા વેસ્ટર્ન ડિસ્ટર્બન્સના કારણે પહાડી વિસ્તારોમાં વરસાદ અને હિમવર્ષા થશે અને મેદાની વિસ્તારોમાં ઠંડા પવનો ફૂંકાશે.

હવામાન વિભાગ અનુસાર, ૯ માર્ચની રાતથી પશ્ચિમ હિમાલયના ક્ષેત્ર પર નવી વેસ્ટર્ન ડિસ્ટર્બન્સ સિસ્ટમ અસર કરી શકે છે. તેના પ્રભાવ હેઠળ, ૯થી ૧૧ માર્ચ દરમિયાન જમ્મુ અને કાશ્મીર, લદાખ, હિમાચલ પ્રદેશ, ઉત્તરાખંડમાં વરસાદ અને હિમવર્ષાની શક્યતા છે. પૂર્વોત્તર આસામ પર ચક્રવાતી પરિભ્રમણ યથાવત્ છે. તેની અસરને કારણે અરુણાચલ પ્રદેશમાં છુટોછવાયો વરસાદ, હિમવર્ષાની સાથે સાથે તોફાન આવશે અને વીજળી પડવાની સંભાવના છે. ગોવા અને કોંકણ-કર્ણાટક વિસ્તારોમાં ગરમીની લહેર શરૂ થઈ ગઈ છે, જ્યારે દેશના બાકીના ભાગોમાં વેસ્ટર્ન ડિસ્ટર્બન્સને કારણે વરસાદ, હિમવર્ષા અને ઠંડા પવનો જોવા મળી રહ્યા છે.