ரூ.72,34,446 மதிப்பில் நலத்திட்ட உதவிகள் அமைச்சர் பி.மூர்த்தி வழங்கினார்

தமிழ்நாடு முதலமைச்சர் மு.க.ஸ்டாலின் "உங்களுடன் ஸ்டாலின்” திட்டத்தின் கீழ் நடத்தப்படும் முதல் முகாமினை கடலூர் மாவட்டம் சிதம்பரம் நகராட்சியில் தொடங்கி வைத்துள்ளார்கள். அதனைத்தொடர்ந்து, மதுரை மாவட்டத்தில் மதுரை மேற்கு ஊராட்சி ஒன்றியத்திற் குட்பட்ட செட்டிகுளம் கிராமத்தில் வணிகவரி மற்றும் பதிவுத்துறை அமைச்சர் பி.மூர்த்தி”உங்களுடன் ஸ்டாலின்” திட்ட முகாமினை துவக்கி வைத்து, துறை சார்ந்த அரங்குகளில் மனுக்கள் பதிவு செய்யப்பட்டு வருவதை பார்வையிட்டார்.

- 

தொடர்ந்து, அமைச்சர் தெரிவித்ததாவது: தமிழ்நாடு முதலமைச்சர் தலைமையிலான தமிழ்நாடு அரசு பொதுமக்களின் நலனை கருத்திற்கொண்டு பல்வேறு திட்டங்களை செயல்படுத்தி வருகிறார்கள். அதன்படி, இன்றைய தினம் தமிழ்நாடு முதலமைச்சர் பொதுமக்களின் குறைகளை வீட்டிற்கே நேரடியாக வந்து கேட்டறிந்து, தீர்வு காணும் வகையில் அனைத்து கிராமப்புறம் மற்றும் நகர்ப்புற பகுதிகளில் “உங்களுடன் ஸ்டாலின்" என்ற சிறப்புத் திட்டத்தை தொடங்கி வைத்துள்ளார்கள். மதுரை கிழக்கு தொகுதியில் பல்வேறு திட்டப் பணிகள் தொடர்ந்து மேற்கொள்ளப்பட்டு வருகின்றன. அதனைத் தொடர்ந்து, இன்றைய தினம் செட்டிகுளம் கிராமத்தில் நடைபெற்று வரும் உங்களுடன் ஸ்டாலின்” திட்ட முகாமில் மதுரை மேற்கு ஊராட்சி ஒன்றியத்திற்குட்பட்ட செட்டிகுளம், ஆலத்தூர் உள்ளிட்ட ஊராட்சிகளை சார்ந்த பொதுமக்கள் கலந்து கொண்டுள்ளனர்.

இம்முகாம்களில் நகர்புறப் பகுதிகளில் 13 துறைகள் மூலம் 43 சேவைகளும் ஊரகப்பகுதிகளில் 15 துறைகள் மூலம் 46 சேவைகளும் அளிக்கப்படுகிறது. உங்களுடன் ஸ்டாலின் திட்டத்தின் கீழ் மதுரை மாவட்டத்தில் மொத்தம் 347 சிறப்பு முகாம்கள் நடைபெற உள்ளது. இம்முகாமிற்கு முன்னோடியாக முகாம் நடைபெறும் பகுதிகளில் தன்னார்வலர்கள் மூலம் துண்டுப்பிரசுரம் மற்றும் விண்ணப்பங்கள் பொதுமக்களுக்கு அளிக்கப்பட்டு, பொதுமக்களிடம் கலந்துரையாடி, அவர்களுக்கு தேவையான மற்றும் தேவைப்படும் திட்டங்கள் குறித்து எடுத்துரைத்து முகாமில் கலந்து கொண்டு பயனடைய உரிய விழிப்புணர்வு அளிக்கப்பட்டுள்ளது.