Fyn swartkop ken van uithou en aanhou

Minder as 'n jaar voor haar 50ste verjaarsdag het Lizl Kuyler besluit dis tyd vir 'n nuwe uitdaging.

- Ilse Schoonraad

Daar en dan, in September 2023, het dié fyn swartkop van die plaas Skimmelkrans net buite George 'n nuwe perd opgesaal en die uitdagende wêreld van uithouritte aangepak.

Sedertdien het sy 'n ongelooflike 2 044 km in die saal tydens uithouritte afgelê en glo Lizl sy kan nog meer doen, maar haar perde se welsyn bly haar eerste prioriteit.

"Om mooi na hulle te kyk is alles, want hulle is jou kosbaarste geskenk wat die sport betref. In September 2025 was ek twee jaar in die sport en dit hou my op my tone. Dit is 'n sport wat jou nederig hou. Daar is ongelooflike ruiters en dis meestal die ouer garde wat met Springbok-baadjies spog. Die sport word deur ouer vroueruiters gedomineer.

"Ek verwonder my aan hierdie ongelooflike sterk vrouens se uithouvermoë wat 120 km en 160 km op een dag op 'n perd se rug kafdraf. Hulle doen dit asof dit tweede natuur is. Amazing!"

Uithouritte het ook 'pit stops'

Lizl sê uithouritte werk op dieselfde beginsel as motorwedrenne. “Die veeartse kyk baie mooi na die perde. Perde kom in op eerste, tweede en derde bene na elke 30 km of 20 km vir 'n veeartsondersoek. Eers moet jy en jou perdeversorger jou perd afkoel tot 'n hartpols van 64 en dan word jou perd na die vet lineups geneem.