விநாயகர் சதுர்த்தி விழா: கோயில்களில் சிறப்பு வழிபாடு

விநாயகர் சதுர்த்தி விழாவையொட்டி வேலூர் மாவட்டம் முழுவதும் 1040 இடங்களில் விநாயகர் சிலைகள் பிரதிஷ்டை செய்யப்பட்டு வழிபாடு செய்யப்பட்டது.

- 

வேலூர்/ திருப்பத்தூர்/ராணிப்பேட்டை, ஆக.27: அனைத்து கோயில்களிலும் விநாயகருக்கு சிறப்பு அபிஷேகம், அலங்கார பூஜைகள் நடைபெற்றன. விநாயகர் சதுர்த்தி புதன்கிழமை கோலாகலமாக கொண்டாடப்பட்டது. இதையொட்டி, வேலூர் மாவட்டத்தில் பல்வேறு இந்து அமைப்புகள், பொதுமக்கள் சார்பில் 1040 இடங்களில் சிலைகள் பிரதிஷ்டை செய்யப்பட்டன.

அதிகபட்சம் 10 அடிக்கு மிகாமல் அமைக்கப்பட்டிருந்தன. சில இடங்களில் புதுமையான வடிவமைப்புடன் விநாயகர் சிலைகள் அமைக்கப்பட்டிருந்தன. குறிப்பாக, தொரப்பாடியில் காவல் நிலையத்தில் காவலர்களாக பணி யாற்றும் விநாயகர்கள், கைதியாக எலி என சித்தரித்து அமைக்கப்பட்டிருந்த விநாயகர் கோயில் வரவேற்பை பெற்றது.

வேலூர் சைதாப்பேட்டை கன்னாரத்தெருவில் 10 அடி உயரம் கொண்ட விநாயகர் 200 கிலோ காகிதத்தில் உருவாக்கப்பட்டிருந்தது. இதேபோல், மாவட்டம் முழுவதும் பல இடங்களில் புதுமையான வடிவமைப்புகளில் அமைக்கப்பட்டிருந்த விநாயகர் சிலைகள் பக்தர்களின் கவனம் ஈர்த்தது.

இதுதவிர, வேலூர் ஜலகண்டேஸ்வரர் கோயிலில் உள்ள செல்வ விநாயகர், ஸ்ரீபுரம் ஸ்ரீநாராயணி பீடம் தங்கக்கோயிலிலுள்ள 1700 கிலோ எடை வெள்ளியாலான ஸ்ரீசக்தி கணபதி, தோட்டப்பாளையத்திலுள்ள செல்வ கணபதி, ஆற்காடு சாலையிலுள்ள வரசித்தி விநாயகர் என மாவட்டம் முழுவதும் அனைத்து கோயில்களிலும் விநாயகருக்கு சிறப்பு அபிஷேகம், அலங்கார பூஜைகள் நடைபெற்றன.

இதனிடையே, வீடுகளில் விநாயகர் வழிபாடு செய்திட ஆங்காங்கே களிமண் விநாயகர் சிலைகளின் விற்பனையும் தீவிரமாக நடைபெற்றன. பொதுமக்கள் பூஜை பொருள்கள் வாங்க கடைவீதிகளில் திரண்டிருந்தனர்.