மலைப் பகுதி பேருந்துகளில் மாற்றுத்திறனாளிகளுக்கு இலவச பயணத் திட்டம்

முதல்வர் மு.க.ஸ்டாலின் அறிவிப்பு

- 

சென்னை, ஆக. 15: இந்திய யூனியன் முஸ்லிம் லீக் கட்சியின் தேசியத் தலைவர் கே.எம். காதர் மொகிதீனுக்கு ‘தகைசால் தமிழர்’ விருதை முதல்வர் மு.க.ஸ்டாலின் வழங்கினார். இதேபோன்று, இஸ்ரோ தலைவர் வ.நாராயணனுக்கு ‘டாக்டர் ஏபிஜெ அப்துல்கலாம்’ விருது வழங்கி கௌரவித்தார்.

சென்னையில் வெள்ளிக்கிழமை நடைபெற்ற சுதந்திர தின விழாவில், பல துறைகளில் சிறந்து விளங்குவோருக்கு தமிழக அரசின் தனித்துவமான விருதுகளை முதல்வர் மு.க.ஸ்டாலின் வழங்கினார்.

அதன் விவரம்:

தமிழ்நாட்டின் வளர்ச்சிக்கும், தமிழினத்துக்கும் பெரும் பங்காற்றி வருபவர்களுக்கு ‘தகைசால் தமிழர்’ விருது வழங்கப்பட்டு வருகிறது. அந்த வகையில், நிகழாண்டு இவ்விருது இந்திய யூனியன் முஸ்லிம் லீக் கட்சியின் தலைவர் காதர் மொகிதீனுக்கு முதல்வர் மு.க.ஸ்டாலின் வழங்கினார். இஸ்ரோவில் 41 ஆண்டுகளாக பல முக்கிய தலைமைப் பொறுப்புகளில் சிறப்பாகப் பணியாற்றி இப்போது அதன் தலைவராக உயர்ந்துள்ள வி.நாராயணனுக்கு அறிவியல் தொழில்நுட்பத்துக்கான ஏபிஜெ அப்துல் கலாம் விருது வழங்கப்பட்டது.

கல்பனா சாவ்லா விருது

துணிவு மற்றும் சாகச செயலுக்கான கல்பனா சாவ்லா விருது வழங்கப்படுகிறது. இடது கை தசைநார் சிதைவு குறைபாடு இருந்தபோதும் உடல் சவால்களை தடையாகக் கருதாமல் இறகுப் பந்தாட்டத்தில் சாதனை படைத்து வரும், காஞ்சிபுரம் மாவட்டத்தைச் சேர்ந்த துளசிமதி முருகேசனுக்கு கல்பனா சாவ்லா விருதை முதல்வர் வழங்கினார்.

நல்லாளுமை விருதுகள்: தனித்துவமான யோசனைகள், முன்னெடுப்புகள் மூலமாக, அரசுத் துறைகளில் திட்டங்களைச் செயல்படுத்தி வரும் அதிகாரிகள், அலுவலர்களுக்கு முதல்வரின் நல்லாளுமை விருது வழங்கப்படுகிறது.