திருவண்ணாமலை மலை உச்சியில் மகா தீபம் ஏற்றம்

திருவண்ணாமலை அருணாசலேஸ்வரர் கோயில் கார்த்திகை தீபத் திருவிழாவின் முக்கிய நிகழ்வாக 2,668 அடி உயர மலை உச்சியில் புதன்கிழமை மாலை 6 மணிக்கு மகா தீபம் ஏற்றப்பட்டது. இதில், லட்சக்கணக்கான பக்தர்கள் பங்கேற்று தரிசனம் செய்தனர்.

- 

பஞ்சபூத தலங்களில் அக்னி தலமாகவும், நினைத்தாலே முக்தி அளிக்கும் தலமாகவும் விளங்கும் உண்ணாமுலை அம்மன் உடனுறை அருணாசலேஸ்வரர் கோயிலில் திருக்கார்த்திகை தீபத் திருவிழா நவ. 24ஆம் தேதி கொடியேற்றத்துடன் தொடங்கியது.

நாள்தோறும் ஒவ்வொரு வாகனங்களில் விநாயகர், சந்திரசேகரர் எழுந்தருளி, வீதியுலா வந்து பக்தர்களுக்கு காட்சியளித்தனர். திருவிழாவின் ஏழாம் நாளான நவ. 30-ஆம் தேதி மகா தேரோட்டம் நடைபெற்றது.

பரணி தீபம், மகா தீபம் ஏற்றல்:

திருவிழாவின் முக்கிய நிகழ்வாக மகா தீபத் திருவிழா புதன்கிழமை நடைபெற்றது. இதையொட்டி, அருணாசலேஸ்வரர் கோயில் சுவாமி சந்நிதி எதிரில் அதிகாலை 4 மணிக்கு பரணி தீபம் ஏற்றப்பட்டது. தொடர்ந்து கோயில் பிரம்ம தீர்த்தக்குளத்தில் தீர்த்தவாரி நடைபெற்றது.

ஆனந்ததாண்டவமாடிய அருணாசலேஸ்வரர்:

பின்னர், தங்கக் கொடிமரம் முன் தீப தரிசன மண்டபத்தில் மாலை 4 மணிக்கு பஞ்சமூர்த்திகள் சிறப்பு அலங்காரத்தில் எழுந்தருளினர். அதன் பின்னர், அர்த்தநாரீஸ்வரராக அருணாசலேஸ்வரர் எழுந்தருளினார். ஆண்டுக்கு ஒருமுறை சில நிமிஷங்கள் மட்டுமே காட்சிதரும் அர்த்தநாரீஸ்வரர் ஆனந்ததாண்டவமாடி கோயில் மூன்றாம் பிரகாரத்தில் பக்தர்களுக்கு காட்சியளித்தார்.