விழிப்புணர்வு இல்லாத மலைக் கிராம மக்கள்: சவாலாகும் மகப்பேறு சிகிச்சை

ஈரோடு மாவட்ட மலைப்பகுதிகளில் வசிக்கும் மக்களில் பெரும்பாலானவர்களுக்கு போதிய விழிப்புணர்வு இல்லாததால் மகப்பேறு சிகிச்சையில் சுகாதாரத்துறை பல்வேறு சிக்கல்களை எதிர்கொண்டுள்ளது.

- கே.விஜயபாஸ்கர்

ஈரோடு, ஜூலை 20:

பிரசவங்கள் மருத்துவமனைகளில் நடைபெறுவதை தீவிரமாக ஊக்குவிக்கும் மாநிலமாக தமிழகம் உள்ளது. தேசிய குடும்ப நல ஆய்வின்படி, தமிழகத்தில் 99.6 சதவீத பிரசவங்கள் மருத்துவமனைகளில் நிகழ்கின்றன. ஒவ்வொரு கர்ப்பிணி பெண்ணின் பிரசவமும் கண்காணிக்கப்படுகிறது. குறிப்பாக கிராமங்களில் இந்தக் கண்காணிப்பு தீவிரமாக உள்ளது.

ஆனால், ஈரோடு மாவட்டத்தில் உள்ள மலைக்கிராமங்களில் போதிய விழிப்புணர்வு இல்லாததால் மருத்துமனைகளுக்கு செல்லாமல் வீடுகளிலேயே பிரசவம் பார்க்கும் நிலை இப்போதும் தொடர்வதால் பிரசவ காலத்தில் தாய்-சேய் உயிரிழப்பும் நிகழ்கிறது.

ஈரோடு மாவட்டம், தாளவாடி வட்டம் சோளகர் தொட்டி கிராமத்தில் பழங்குடியினத்தைச் சேர்ந்த 25 வயதுப் பெண் இரண்டாவது பிரசவத்துக்கு கடந்த 7-ஆம் தேதி பைனாபுரம் அரசு ஆரம்ப சுகாதார நிலைய மருத்துவர்கள் நாள் குறித்த நிலையில், கடந்த 5-ஆம் தேதி முதல் அவர் குடும்பத்துடன் மாயமாகிவிட்டார். காவல் துறையினருடன் இணைந்து சுகாதாரத் துறை அதிகாரிகள் அவரைத் தேடி வரும் நிலையில் இதுவரை அவரைக் கண்டுபிடிக்க முடியவில்லை.

முதல் பிரசவத்துக்கே மருத்துவமனைக்கு வருவதற்கு தயக்கம் காட்டிய அந்தப் பெண்ணை சுகாதாரத் துறை அலுவலர்கள் வற்புறுத்தி கோவை மருத்துவக் கல்லூரி மருத்துவமனைக்கு அழைத்துச் சென்றனர். அங்கு அவருக்கு சுகப்பிரசவம் ஆனது. இரண்டாவது முறை கருவுற்றதில் இருந்து சுகாதாரத் துறை பணியாளர்கள் அந்தப் பெண்ணைத் தொடர்ந்து கண்காணித்து வந்தனர். மகப்பேறு பரிசோதனைகளுக்கு அவர் தவறாமல் வந்தார். பிரசவ நேரத்தில் அவரைக் காணவில்லை.