ஆசையைத் தூண்டி மக்களின் வாக்குகளை பெறவே ‘உங்களுடன் ஸ்டாலின்’ திட்டம்

எடப்பாடி கே. பழனிசாமி

- 

திருச்சி/ மணப்பாறை, ஆக. 25: ஆசையைத் தூண்டி மக்களின் வாக்குகளைப் பெறவே ‘உங்களுடன் ஸ்டாலின்’ திட்டம் என அதிமுக பொதுச்செயலரும், எதிர்க்கட்சித் தலைவருமான எடப்பாடி கே. பழனிசாமி குற்றஞ்சாட்டினார்.

‘மக்களைக் காப்போம் தமிழகத்தை மீட்போம்’ பிரசார சுற்றுப்பயணத்தின் ஒரு பகுதியாக அவர் திருச்சி மேற்கு எம்எல்ஏ தொகுதிக்குள்பட்ட புத்தூர் நான்கு சாலை சந்திப்பு பகுதியில் திங்கள்கிழமை பேசியதாவது:

திமுக ஆட்சியில் அமைச்சர் நேருவின் நகராட்சி நிர்வாகத் துறையின் திறனின்மையால், திருச்சி உறையூரில் குடிநீரில் கழிவுநீர் கலந்து 3 பேர் உயிரிழந்தனர். மாநகராட்சி வீடு கட்ட வரைபட அனுமதிக்கட்டணத்தை மிக அதிகளவில் உயர்த்திவிட்டனர். அமைச்சர் நேருவின் நிலத்துக்கு மதிப்பு உயர வேண்டுமென்பதற்காவே திருச்சி பஞ்சப்பூரில் பேருந்து நிலையம் கட்டியிருக்கின்றனர். திருச்சியில் திமுகவினர் மிரட்டி வாங்கிய சொத்துகள் மீட்கப்படும்.

விவசாயிகளுக்கு விரோதம்?: ராமநாதபுரம் மாவட்டத்தில் ஹைட்ரோ கார்பன் எடுக்க 20 கிணறுகளுக்கு அனுமதி அளிக்கப்பட்டுள்ளது குறித்து அமைச்சர் தெரியாது என்கிறார். எதுவும் தெரியாமல்தான் அரசு நடக்கிறதா?. திமுக அரசு தெரிந்துதான் அனுமதி கொடுத்திருக்கிறது. இது விவசாயிகளின் விரோத அரசு.